“محرم الحرام پر دو روزہ عام تعطیل، کراچی ٹریفک پلان بھی جاری”

وفاقی حکومت نے دو روز کی عام تعطیل کا اعلان کردیا ہے جس کا نوٹیفکیشن بھی جاری کردیا گیا ہے۔ 9 اور 10 محرم الحرام کو عام تعطیل ہوگی اور اس موقع پر تمام نجی و سرکاری ادارے بند رہیں گے۔

علاوہ ازیں، کراچی ٹریفک پولیس نے محرم الحرام میں جلوسوں کے پیش نظر ٹریفک پلان جاری کردیا ہے۔

کراچی میں 8، 9 اور 10 محرم الحرام کا مرکزی جلوس نشتر پارک سے برآمد ہوگا اور جلوس مقررہ راستوں سے ہوتا ہوا حسینیہ ایرانیان امام بارگاہ پر اختتام پذیر ہوگا۔

یہ پڑھیں: کراچی میں کل سے 6 تاریخ تک کون کون سے راستے بند ہوں گے؟

ٹریفک پولیس کا کہنا ہے کہ سیکیورٹی وجوہات کی بنا پر ایم اے جناح روڈ گرومندر سے ٹاور تک بند رہے گا۔

ٹریفک پلان کے تحت ناظم آباد سے آنے والے لسبیلہ سے نشتر روڈ، جانب گارڈن سے اپنی منزل کی طرف جا سکتے ہیں، جبکہ لیاقت آباد سے آنے والے تین ہٹی سے دائیں جانب لسبیلہ اور مارٹن روڈ کی طرف جا سکتے ہیں۔

حسن اسکوائر سے پی پی چورنگی جانے والے جیل فلائی اوور کے نیچے سے کشمیر روڈ اور حسن اسکوائر سے پی پی چورنگی جانے والے جیل فلائی اوور سے تین ہٹی اور نشتر روڈ جا سکتے ہیں۔

شاہراہ قائدین سے نمائش جانے والے سوسائٹی لائٹ سگنل سے کشمیر روڈ کی طرف اور جمشید روڈ سے ایم اے جناح جانے والے گرومندر سے سولجر بازار کے راستے اپنی منزل تک جا سکتے ہیں۔

گارڈن سے ایم اے جناح جانے والے انکل سریا سے دائیں جانب گل پلازہ جا سکتے ہیں، جبکہ گارڈن سے ایم اے جناح جانے والے کوسٹ گارڈ ہولی فیملی اسپتال کے راستے اپنی منزل تک پہنچ سکتے ہیں۔

سپر ہائی وے سے آنے والی ہیوی ٹریفک کو لیاقت آباد 10 نمبر سے ناظم آباد موڑ دیا جائے گا جبکہ ٹریفک کو گرومندر چوک سے آگے جلوس کے روٹ پر جانے کی اجازت نہیں ہوگی۔