سندھ ہائیکورٹ نے فلم ساز جامی کی سزا معطل کر کے ضمانت منظور کر لی

سندھ ہائیکورٹ میں فلم پروڈیوسر، رائٹر اور ڈائریکٹر جمشید محمود عرف جامی کی سزا کے خلاف اپیل کی سماعت ہوئی۔

سماعت کے دوران جامی کے وکیل حافظ محمد یحییٰ ایڈووکیٹ نے مؤقف اختیار کیا کہ ایڈیشنل ڈسٹرکٹ اینڈ سیشن جج جنوبی نے براہِ راست شکایت پر جرم ثابت ہونے پر ان کے موکل کو 2 سال قید اور جرمانے کی سزا سنائی تھی۔

وکیل نے عدالت کو بتایا کہ جس جرم میں جامی کو سزا سنائی گئی وہ قابلِ ضمانت ہے اور ماتحت عدالت نے قانونی تقاضے پورے نہیں کیے۔

ان کا کہنا تھا کہ جامی پر لگائے گئے الزامات غلط اور بے بنیاد ہیں اور ماتحت عدالت کی جانب سے سنائی گئی سزا کو کالعدم قرار دیا جائے۔

دلائل سننے کے بعد سندھ ہائیکورٹ نے جمشید محمود عرف جامی کی سزا معطل کر دی اور ان کی ضمانت منظور کر لی۔

عدالت نے انہیں 50 ہزار روپے کے مچلکے جمع کرانے کا حکم دیا۔

یاد رہے کہ فلم اور میوزک ڈائریکٹر سہیل جاوید نے جمشید محمود عرف جامی کے خلاف براہِ راست شکایت دائر کی تھی۔

وکیل کے مطابق عدالتی فیصلے کے بعد جامی کو آج ہی جیل سے رہا کر دیا جائے گا۔