آرمی چیف جنرل عاصم منیر کا سول سروس اکیڈمی میں خطاب – قومی ہم آہنگی، کردار اور پاکستانیت پر زور

فوج کے شعبہ تعلقات عامہ (آئی ایس پی آر) کے مطابق آرمی چیف فیلڈ مارشل جنرل عاصم منیر نے سول سروسز اکیڈمی کے 52ویں کامن ٹریننگ پروگرام کے شرکاء سے خطاب کیا۔

اس موقع پر انہوں نے کہا کہ ملک کی ترقی اور کامیابی کے لیے عوام، حکومت اور افواج کے درمیان مضبوط رشتہ ضروری ہے۔

انہوں نے سول بیوروکریسی کو ریاست کی ہم آہنگی کی بنیاد قرار دیا اور کہا کہ اس اہم ذمہ داری کا بوجھ آپ سب کے کندھوں پر ہے۔

جنرل عاصم منیر نے کہا کہ ریاست کی اکائیوں نے معرکہ حق میں مثالی ہم آہنگی کا مظاہرہ کیا۔

انہوں نے بتایا کہ پاکستان نے کشمیر کی لائن آف کنٹرول سے لے کر سمندر تک بھارت کی بلاجواز جارحیت کا بہترین جواب دیا۔

ان کا کہنا تھا کہ اللّٰہ نے اس معرکے میں ہماری مدد کی، کیونکہ ہم حق پر تھے، اور افواج پاکستان ہر دور کے جنگی تقاضوں کے مطابق ہمہ وقت تیار رہتی ہیں۔

انہوں نے مزید کہا کہ ہم بھارت کو صاف پیغام دیتے ہیں کہ پاکستان نے پہلے اس کی اجارہ داری قبول کی اور نہ کبھی کرے گا۔

ان کا کہنا تھا کہ دہشتگردی بھارت کا اپنا اندرونی مسئلہ ہے، جو اس کی اقلیتوں، خاص طور پر مسلمانوں پر متعصبانہ اور ظالمانہ رویوں کا نتیجہ ہے۔

آرمی چیف نے بھارت کو خطے میں دہشتگردی کا سب سے بڑا سرپرست قرار دیا اور کہا کہ بحیثیت قوم ہم کبھی بھارت کے آگے نہیں جھکے اور نہ جھکیں گے۔

جنرل عاصم منیر نے افغانستان کا ذکر کرتے ہوئے کہا کہ وہ ہمارا برادر پڑوسی اور اسلامی ملک ہے، اور ہم اس سے اچھے تعلقات چاہتے ہیں۔

ساتھ ہی انہوں نے کہا کہ ہمارا بس ایک ہی مطالبہ ہے کہ وہ بھارت کی دہشتگردانہ پراکسیوں، فتنہ الہندوستان اور فتنہ الخوارج کو اپنی سرزمین پر جگہ نہ دے۔

آرمی چیف نے نوجوان افسران کو نصیحت کی کہ اپنی انفرادی اور علاقائی پہچان سے بڑھ کر پاکستانیت کی شناخت کو اپنائیں۔

انہوں نے کہا کہ ہر نظام میں مسائل اور کمزوریاں ہوتی ہیں، مگر آپ کا فرض ہے کہ ان کمزوریوں کو نظام پر حاوی نہ ہونے دیں۔

ان کا کہنا تھا کہ جو قومیں اپنی تاریخ بھول جاتی ہیں، ان کا مستقبل بھی تاریک ہو جاتا ہے، اس لیے پاکستان کی کہانی کو جانیں اور اگلی نسلوں تک پہنچائیں۔

انہوں نے زور دیا کہ ملک سے محبت اور وفاداری سب سے پہلی شرط ہے، اور اپنے اندر جرات، قابلیت اور کردار پیدا کریں، اگر کسی ایک کو چننا ہو تو ہمیشہ کردار کو ترجیح دیں۔

اس موقع پر کورس کے شرکاء نے آرمی چیف سے ملاقات بھی کی۔

افسران نے امن کے زمانے میں کشمیر، خیبرپختونخوا اور بلوچستان کے آپریشنل علاقوں میں پاک فوج کی فارمیشنز کے ساتھ گزارے گئے وقت اور تینوں مسلح افواج کی خدمات میں حاصل تجربات بھی شیئر کیے۔

آئی ایس پی آر کے مطابق آرمی چیف نے اپنے خطاب میں ادارہ جاتی ہم آہنگی، سول اور عسکری قیادت کے درمیان مؤثر رابطوں کی ضرورت پر زور دیا۔

انہوں نے قومی سلامتی کی ضروریات، اندرونی و بیرونی چیلنجز، علاقائی امن اور قومی استحکام میں مسلح افواج کے کردار پر بھی روشنی ڈالی۔

جنرل عاصم منیر نے پاکستان کے اسٹریٹجک اور ترقیاتی اہداف کو آگے بڑھانے کے لیے اداروں میں ہم آہنگی، باہمی احترام اور مشترکہ قومی مقصد کی ضرورت پر زور دیا۔

آخر میں انہوں نے نوجوان افسران سے کہا کہ اپنی ذمہ داریاں دیانتداری، پیشہ ورانہ مہارت اور حب الوطنی کے جذبے کے ساتھ انجام دیں اور خدمت کے اعلیٰ ترین معیار کو اپنائیں۔