“وزیراعظم شہباز شریف کا دورہ چین: شنگھائی تعاون تنظیم اجلاس میں شرکت کا امکان”

اسلام آباد:
وزیراعظم شہباز شریف کے آئندہ دورۂ چین کی تیاریاں تیزی سے جاری ہیں۔ سفارتی ذرائع کے مطابق اس سلسلے میں پاکستان کی وزارتِ خارجہ اور چینی وزارتِ خارجہ کے درمیان مسلسل رابطہ ہے۔

ذرائع کا کہنا ہے کہ وزیراعظم کا یہ اہم دورہ اگست میں متوقع ہے، جس کے شیڈول کو حتمی شکل دی جا رہی ہے۔
اس دورے کے دوران وزیراعظم چین کے شہر تیانجن میں ہونے والے شنگھائی تعاون تنظیم (SCO) کے سربراہی اجلاس میں شرکت کریں گے، جہاں وہ پاکستان کی نمائندگی کریں گے۔

سفارتی ذرائع کے مطابق وزیراعظم یہ دورہ چینی قیادت کی دعوت پر کریں گے، اور ان کے ہمراہ ایک اعلیٰ سطحی وفد بھی چین جائے گا۔
دورے کے دوران وزیراعظم کی دیگر عالمی رہنماؤں کے ساتھ سائیڈ لائن ملاقاتیں بھی متوقع ہیں۔

شنگھائی تعاون تنظیم کے اجلاس میں بھارتی وزیراعظم نریندر مودی کی شرکت کا امکان بھی ظاہر کیا جا رہا ہے، جس سے اس اجلاس کی اہمیت مزید بڑھ گئی ہے۔

ادھر قومی سلامتی کے مشیر، لیفٹیننٹ جنرل (ر) محمد عاصم ملک، ان دنوں چین کے دورے پر موجود ہیں۔
اپنے حالیہ دورے میں انہوں نے چینی حکام سے ملاقاتیں کیں اور پاکستان کی جانب سے خطے میں پرامن ہمسائیگی کے عزم کو دہرایا۔

انہوں نے SCO کی سلامتی کونسل کے سیکرٹریز کے اجلاس میں بھی شرکت کی اور موجودہ عالمی تناظر میں پاکستان کے مؤقف اور سلامتی سے متعلق موقف پر روشنی ڈالی۔