بھارت کا سندھ طاس معاہدہ معطل کرنے کا اعلان عالمی قوانین کی خلاف ورزی ہے، دفتر خارجہ
تفصیلات کے مطابق دفتر خارجہ کے ترجمان نے اپنے بیان میں کہا ہے کہ بھارت کا حالیہ بیان عالمی معاہدوں کی حرمت کو نظرانداز کرنے کے مترادف ہے۔
انہوں نے کہا کہ سندھ طاس معاہدے میں یکطرفہ اقدام کی کوئی گنجائش موجود نہیں۔
ترجمان کا کہنا تھا کہ سندھ طاس معاہدہ کوئی سیاسی انتظام نہیں بلکہ ایک بین الاقوامی معاہدہ ہے جس پر دونوں ممالک نے دستخط کیے ہیں۔
پاکستان نے واضح طور پر کہا ہے کہ بھارت کی جانب سے معاہدے کو معطل رکھنے کا اعلان عالمی قانون کے خلاف ہے۔
دفتر خارجہ کے مطابق بھارتی بیان خود معاہدے کی شقوں کی کھلی خلاف ورزی ہے۔
ترجمان نے مزید کہا کہ یہ اقدام بین الدولی تعلقات کے بنیادی اصولوں کے بھی منافی ہے۔
انہوں نے خبردار کیا کہ اس قسم کا رویہ ایک غیرذمہ دار اور خطرناک مثال قائم کرتا ہے جو عالمی سطح پر معاہدوں کی ساکھ کو مجروح کرتا ہے۔
ترجمان دفتر خارجہ کا کہنا تھا کہ بھارت کا یہ رویہ ریاستی طرزِ عمل پر بھی سنگین سوالات کھڑے کرتا ہے۔
انہوں نے کہا کہ بھارت کھلے عام اپنے قانونی وعدوں سے انکار کر رہا ہے۔
سیاسی مقاصد کے لیے پانی کو بطور ہتھیار استعمال کرنا نہایت غیرذمہ دارانہ طرزِ عمل ہے۔
ترجمان نے زور دیا کہ پانی کو بطور ہتھیار استعمال کرنا مہذب ریاستی اصولوں کے سراسر منافی ہے۔
انہوں نے مطالبہ کیا کہ بھارت فوری طور پر یکطرفہ اور غیرقانونی مؤقف سے دستبردار ہو۔
دفتر خارجہ نے کہا کہ بھارت کو سندھ طاس معاہدے پر مکمل عمل درآمد بحال کرنا چاہیے۔
ترجمان نے یقین دلایا کہ پاکستان سندھ طاس معاہدے سے مکمل وابستگی رکھتا ہے۔
اور پاکستان اپنے جائز حقوق اور مفادات کے تحفظ کے لیے تمام ضروری اقدامات کرے گا۔
