وزیراعظم شہباز شریف اور امریکی وزیر خارجہ کی گفتگو، پاک امریکا تعلقات کے فروغ پر اتفاق
وزیراعظم شہباز شریف اور امریکی وزیر خارجہ مارکو روبیو کے درمیان ٹیلیفونک رابطہ ہوا، جس میں باہمی دلچسپی کے امور اور علاقائی صورتحال پر تبادلہ خیال کیا گیا۔
گفتگو کے دوران وزیراعظم شہباز شریف نے سابق امریکی صدر ڈونلڈ ٹرمپ کی قیادت کو جرأتمندانہ قرار دیا اور پاک بھارت سیز فائر میں امریکی سفارتی کردار کو سراہا۔
وزیراعظم نے واضح کیا کہ جنوبی ایشیا میں دیرپا امن کے لیے پاکستان اور بھارت کے درمیان مذاکرات ناگزیر ہیں۔
ان کا کہنا تھا کہ جموں و کشمیر، پانی، تجارت اور دہشت گردی جیسے اہم مسائل پر کھلے دل سے بات چیت ہونی چاہیے۔
شہباز شریف نے ایران اور اسرائیل کے درمیان جاری کشیدگی پر بھی اظہارِ خیال کرتے ہوئے کہا کہ اس تنازع کا حل مذاکرات اور سفارت کاری کے ذریعے ہی ممکن ہے۔
انہوں نے کہا کہ پاکستان مشرق وسطیٰ میں امن کے لیے ایک مثبت اور تعمیری کردار ادا کرنے کے لیے تیار ہے۔
وزیراعظم نے پاک امریکا تعلقات کی وسعت کی ضرورت پر زور دیا اور کہا کہ دونوں ممالک کو تجارت، توانائی، معدنیات اور آئی ٹی سمیت مختلف شعبوں میں تعاون بڑھانا ہوگا۔
اس موقع پر امریکی وزیر خارجہ مارکو روبیو نے پاکستان کی علاقائی امن کے لیے کوششوں کی تعریف کی اور انسداد دہشت گردی میں پاکستان کے کردار کو بھی سراہا۔
گفتگو میں دونوں رہنماؤں نے پاک امریکا تعلقات کو عملی اقدامات میں بدلنے پر اتفاق کیا۔
سرکاری اعلامیے کے مطابق وزیراعظم نے امریکی صدر ٹرمپ کو ایک بار پھر دورہ پاکستان کی دعوت دی اور ساتھ ہی وزیر خارجہ کو بھی پاکستان آنے کی دعوت دی۔
جواب میں مارکو روبیو نے کہا کہ امریکا پاکستان کے ساتھ تمام شعبوں میں تعاون بڑھانے کا خواہاں ہے، اور پاکستان ایران سے اپنے قریبی تعلقات کی بدولت خطے میں ایک اہم کردار ادا کر سکتا ہے۔
