صدر ٹرمپ کا دعویٰ: پاکستان اور بھارت کے درمیان ایٹمی جنگ رکوانے میں کردار ادا کیا
تفصیلات کے مطابق امریکی صدر ڈونلڈ ٹرمپ اور نیٹو کے سیکریٹری جنرل کے درمیان وائٹ ہاؤس میں ملاقات ہوئی، جس کے بعد صدر ٹرمپ نے میڈیا سے گفتگو کی۔
انہوں نے ایک بار پھر پاکستان اور بھارت کے درمیان کشیدگی ختم کرانے میں امریکی کردار کا ذکر کیا۔
صدر ٹرمپ نے کہا کہ امریکا نے پاکستان اور بھارت کے درمیان جنگ رکوانے میں کامیابی حاصل کی۔ ان کے بقول اگر امریکا نے مداخلت نہ کی ہوتی تو دونوں ممالک کے درمیان ایک ہفتے میں ایٹمی جنگ چھڑ سکتی تھی۔
ان کا مزید کہنا تھا کہ دونوں ملکوں کے لیڈرز بہت زبردست ہیں، اور امریکا نے تجارت کے ذریعے خطرناک تصادم کو روکنے میں اہم کردار ادا کیا۔
یاد رہے کہ اسی ماہ کے اوائل میں صدر ٹرمپ نے اسرائیلی وزیر اعظم بنیامین نیتن یاہو سے عشایئے کے دوران گفتگو میں بھی یہی بات دہرائی تھی۔ اس موقع پر انہوں نے کہا تھا کہ پاکستان اور بھارت دونوں ایٹمی طاقتیں ہیں، اور امریکا نے ان کے درمیان جنگ رکوانے کے ساتھ ساتھ انہیں جنگ کے بدلے تجارت کی پیشکش بھی کی تھی۔
اس سے قبل ریاست آئیوا میں امریکا کے ڈھائی سو سالہ یومِ آزادی کی تقریب سے خطاب کرتے ہوئے بھی صدر ٹرمپ نے کہا تھا کہ ان کی حکومت نے پاکستان اور بھارت کے درمیان ممکنہ نیوکلیئر جنگ کو روکا۔ انہوں نے خبردار کیا تھا کہ دونوں ملک ایٹمی ہتھیار رکھتے ہیں اور ان کے درمیان کشیدگی کسی بڑے سانحے میں تبدیل ہو سکتی تھی جسے امریکا نے اپنی مداخلت سے ٹال دیا۔
