حکومت سندھ کا عاشورہ پر 5 اور 6 جولائی کو عام تعطیل کا اعلان
تفصیلات کے مطابق سندھ حکومت نے عاشورہ کے موقع پر صوبے بھر میں دو روز — 5 اور 6 جولائی (جمعہ اور ہفتہ) — عام تعطیل کا اعلان کر دیا ہے۔
یہ اعلان یکم جولائی کو جاری ہونے والے ایک باضابطہ نوٹیفکیشن کے ذریعے کیا گیا، جسے سروسز، جنرل ایڈمنسٹریشن اینڈ کوآرڈینیشن ڈیپارٹمنٹ نے جاری کیا۔
نوٹیفکیشن کے مطابق یہ تعطیلات سندھ کے تمام سرکاری دفاتر، خودمختار اور نیم خودمختار اداروں، کارپوریشنز، اور حکومت سندھ کے انتظامی کنٹرول میں کام کرنے والی لوکل کونسلز پر لاگو ہوں گی۔
تاہم، لازمی اور ضروری خدمات فراہم کرنے والے ادارے ان تعطیلات میں کام جاری رکھیں گے۔
یہ اعلان چیف سیکریٹری سندھ آصف حیدر شاہ کی جانب سے کیا گیا، اور متعلقہ تمام محکموں کو اس فیصلے پر عملدرآمد کے لیے باقاعدہ نوٹیفکیشن بھی بھیج دیا گیا ہے۔
عاشورہ کا دن اسلامی تاریخ میں خاص اہمیت رکھتا ہے۔ یہ دن نواسۂ رسول ﷺ حضرت امام حسین رضی اللہ عنہ اور ان کے ساتھیوں کی کربلا میں شہادت کی یاد میں منایا جاتا ہے۔
عاشورہ کے موقع پر سندھ بھر میں مجالس اور جلوسوں کا انعقاد کیا جاتا ہے، جس کے پیش نظر سخت سیکیورٹی انتظامات کیے گئے ہیں۔
حکام نے عوام سے اپیل کی ہے کہ وہ ان ایام کو مذہبی عقیدت، سنجیدگی اور ذمہ داری سے منائیں، اور امن و امان برقرار رکھنے میں قانون نافذ کرنے والے اداروں سے بھرپور تعاون کریں۔
