کوئٹہ سے اغوا ہونے والا 10 سالہ مصور خان کاکڑ جاں بحق – ڈی این اے سے لاش کی شناخت

تفصیلات کے مطابق ڈی آئی جی بلوچستان پولیس اعتزاز گورایا نے بتایا ہے کہ دشت کے علاقے سے ملنے والی لاش مغوی بچے مصور خان کاکڑ کی ہے۔

ان کے مطابق ڈی این اے ٹیسٹ کے بعد لاش کی تصدیق ہوئی اور اسے لواحقین کے حوالے کر دیا گیا۔

اعتزاز گورایا نے بتایا کہ اس بچے کے اغوا میں کالعدم تنظیم داعش کا ہاتھ ہے۔

انہوں نے کہا کہ مغوی کے اہلخانہ سے 12 ملین ڈالر تاوان طلب کیا گیا تھا۔

ڈی آئی جی بلوچستان نے یہ بھی واضح کیا کہ کیس ابھی بند نہیں ہوا۔

ان کا کہنا تھا کہ ملزمان کی تلاش اور ان کا تعاقب جاری ہے۔

انہوں نے مزید کہا کہ کالعدم تنظیموں کی آپسی لڑائی کی اطلاعات بھی ملی تھیں، مگر یہ تصدیق نہیں کی جا سکتی کہ بچے کی شہادت لڑائی کے دوران ہوئی۔

بلوچستان حکومت کے ترجمان شاہد رند نے کہا کہ اغوا کے بعد سے بچے کے والدین نے پولیس سے بھرپور تعاون کیا۔

انہوں نے افسوس کا اظہار کرتے ہوئے کہا کہ تمام تر کوششوں کے باوجود بچے کو بحفاظت بازیاب نہیں کرایا جا سکا۔

یاد رہے کہ گزشتہ سال نومبر میں 10 سالہ مصور خان کو کوئٹہ میں اسکول وین سے نامعلوم افراد نے اغوا کر لیا تھا۔

بعد ازاں سپریم کورٹ کے آئینی بینچ نے بچوں کے اغوا سے متعلق کیس کی سماعت کے دوران کوئٹہ کے اس واقعے کا بھی نوٹس لیا تھا۔

عدالت نے بچوں کے اغوا کے بڑھتے ہوئے واقعات پر تمام آئی جیز اور سیکرٹری داخلہ کو طلب کیا تھا