صدر آصف علی زرداری سے چینی سفیر کی ملاقات، دوطرفہ تعلقات مزید مضبوط بنانے پر اتفاق

ایوانِ صدر اسلام آباد میں چینی سفیر جیانگ زائی دونگ نے صدرِ مملکت آصف علی زرداری سے اہم ملاقات کی، جس میں پاکستان اور چین کے درمیان دوطرفہ تعلقات، باہمی دلچسپی کے امور اور علاقائی تعاون پر تفصیلی تبادلہ خیال کیا گیا۔

اس موقع پر صدر مملکت نے کہا کہ پاکستان چین کے ساتھ اپنے تعلقات کو نہایت اہمیت دیتا ہے، اور دونوں ممالک کے درمیان تجارت، معیشت، ثقافت اور علاقائی روابط کے فروغ کے وسیع امکانات موجود ہیں۔ انہوں نے زور دیا کہ خطے میں امن، سلامتی اور خوشحالی کے لیے دونوں ملکوں کو مل کر کام کرنا ہوگا۔

صدر آصف علی زرداری نے چینی حکومت اور عوام کی مستقل حمایت پر شکریہ ادا کرتے ہوئے کہا کہ چین نے ہمیشہ ہر مشکل گھڑی میں پاکستان کا بھرپور ساتھ دیا ہے۔ انہوں نے اس بات کو بھی سراہا کہ چین پاکستان کی سماجی و اقتصادی ترقی میں ایک کلیدی شراکت دار کا کردار ادا کر رہا ہے۔

ملاقات کے دوران چینی سفیر نے صدر زرداری کی آئندہ سالگرہ کے موقع پر چینی صدر شی جن پنگ کی جانب سے دلی نیک خواہشات کا خصوصی پیغام بھی پہنچایا، جس پر صدر پاکستان نے شکریہ ادا کرتے ہوئے باہمی تعلقات کو مزید گہرا کرنے کے عزم کا اعادہ کیا۔