صحت کارڈ میں ٹرانسپلانٹ اور ایمپلانٹ کی شمولیت سے مریضوں کے لیے

مشیر صحت احتشام نے بتایا ہے کہ صوبے میں صحت کارڈ کے تحت مفت علاج کی سہولت عوام کو مہیا کی جا رہی ہے، جب کہ اب صحت ٹرانسپلانٹ اینڈ ایمپلانٹ کارڈ کو بھی صحت کارڈ کا مستقل حصہ بنا دیا گیا ہے۔ اس اقدام کا مقصد ایسے مریضوں کے لیے نئی امید پیدا کرنا ہے جو زندگی اور موت کی کشمکش میں مبتلا ہیں۔

صوبائی حکومت کے جاری کردہ اعداد و شمار کے مطابق، گزشتہ دو ماہ کے دوران اس نئے کارڈ کے تحت 48 کامیاب ٹرانسپلانٹس اور ایمپلانٹس کیے جا چکے ہیں، جن پر 118 ملین روپے سے زائد کی رقم خرچ کی گئی۔

• 23 مفت کڈنی ٹرانسپلانٹس کے ذریعے تقریباً 45 ملین روپے کی لاگت سے مریضوں کی زندگیاں بچائی گئیں۔

• 4 لیور ٹرانسپلانٹس پر 25 ملین روپے خرچ کیے گئے۔

• 21 کوکلیئر ایمپلانٹس پر 45 ملین روپے صرف کر کے بچوں کو سننے کی صلاحیت واپس دلائی گئی اور ان کے خاندانوں میں خوشیاں لوٹائی گئیں۔

مشیر صحت کے مطابق یہ سہولیات سرکاری و نجی دونوں اسپتالوں میں فراہم کی جا رہی ہیں تاکہ صوبے کے کسی بھی شہری کو بروقت اور معیاری علاج میسر آ سکے اور کسی کو بھی علاج کے لیے دربدر نہ ہونا پڑے۔