راولپنڈی کے علاقے ڈھوک چوہدریاں کی رہائشی 11 سالہ کائنات پیٹ میں درد کی شکایت پر تین روز قبل ہولی فیملی اسپتال میں داخل کی گئی تھی۔
بچی کے والد کے مطابق، ڈاکٹرز نے مرض کی درست تشخیص نہ کر پانے پر اپینڈکس کا آپریشن کیا، مگر آپریشن کے بعد بھی کائنات کی حالت بہتر نہ ہوئی اور وہ مسلسل درد سے تڑپتی رہی۔
لواحقین نے الزام عائد کیا کہ ڈیوٹی پر موجود ڈاکٹر کی مبینہ غفلت کے باعث کائنات دم توڑ گئی۔ اس واقعے کے بعد ورثا نے بچی کی میت وصول کرنے سے انکار کر دیا۔
ایم ایس ہولی فیملی اسپتال ڈاکٹر اعجاز بٹ نے واقعے کا نوٹس لیتے ہوئے تین رکنی تحقیقاتی کمیٹی تشکیل دے دی ہے، جس کی رپورٹ کے بعد ذمہ داروں کے خلاف کارروائی عمل میں لانے کا کہا گیا ہے۔
