بھارت کے شمالی علاقوں میں موسلادھار بارشوں نے تباہی مچا دی۔ رپورٹس کے مطابق 360 ملی میٹر بارش کے باعث دریاؤں کے بند ٹوٹ گئے، متعدد پُل اور سڑکیں بہہ گئیں جبکہ وادی میں موبائل انٹرنیٹ، براڈبینڈ اور ٹیلی فون سروس مکمل طور پر معطل ہوگئی ہے۔
قدرتی آفات کے نتیجے میں اب تک 30 افراد جاں بحق ہوچکے ہیں، جبکہ جموں اور ڈوڈا میں ہلاکتوں کی تعداد 37 تک پہنچ گئی ہے۔ یوں مجموعی طور پر ہلاکتیں 67 ہوچکی ہیں۔
حکام کے مطابق دریائے جہلم میں پانی کی سطح خطرناک حد سے اوپر جاچکی ہے، اور بارشوں کے مزید جاری رہنے کے خدشے کے پیش نظر تمام تعلیمی ادارے آج بھی بند رکھنے کا اعلان کیا گیا ہے۔
شدید بارشوں کی لپیٹ میں ہماچل پردیش اور پنجاب بھی آگئے ہیں۔ منالی اور پٹھان کوٹ میں دریاؤں میں طغیانی کے باعث عمارتیں گر گئیں اور گاڑیاں بہہ گئیں۔
