اینٹی کرپشن عدالت میں ٹڈاپ کیس: یوسف رضا گیلانی 9 مقدمات میں بری

اینٹی کرپشن عدالت میں ٹڈاپ اسکینڈل کیس کی سماعت ہوئی، جہاں سابق وزیر اعظم یوسف رضا گیلانی ذاتی حیثیت میں پیش ہوئے۔

عدالت نے سماعت کے بعد انہیں 9 مقدمات میں بری کر دیا۔

تاہم یوسف رضا گیلانی کے خلاف اب بھی 14 مقدمات زیر سماعت ہیں۔

اس موقع پر یوسف رضا گیلانی نے میڈیا سے بات کرتے ہوئے کہا کہ میں کئی سالوں سے ان مقدمات کا سامنا کر رہا ہوں، آج کچھ کیسز میں بریت ملی ہے۔

انہوں نے کہا کہ میں سب سے زیادہ عرصہ جمہوری وزیر اعظم رہ چکا ہوں اور ہمیشہ قانون کے مطابق چلنے کی کوشش کی ہے۔

عدالت میں ان کے وکیل فاروق ایچ نائیک دلائل جمع کروا چکے تھے۔

ملزمان پر الزام ہے کہ فریٹ سبسڈی کی مد میں قومی خزانے کو 6 ارب روپے سے زائد نقصان پہنچایا گیا۔

سابق وزیر اعظم کا کہنا تھا کہ اس کیس میں جو وعدہ معاف گواہ تھا، وہ آج خود ملزم ہے اور ملک سے فرار ہے۔

انہوں نے کہا کہ مجھ پر کیس بنانے والے آج ہماری اتحادی حکومت کا حصہ ہیں اور میں جو بھی کام کرتا ہوں آئین کے مطابق کرتا ہوں۔

اس موقع پر انہوں نے صدر مملکت آصف علی زرداری کے استعفے کی افواہوں پر بھی ردعمل دیا اور کہا کہ اس حوالے سے پھیلنے والی باتیں درست نہیں۔

یوسف رضا گیلانی نے کہا کہ میں نے ایک معزز رکن سینیٹ کے پروڈکشن آرڈر جاری کئے تھے، یہ ان کا آئینی حق ہے کہ سیشن میں آئیں، کل جس رکن سینیٹ کو گرفتار کیا گیا ہے اسے بھی ایوان میں لایا جائے۔

ان کا کہنا تھا کہ نہروں کے معاملے کو بھی میرٹ پر حل ہونا چاہیے۔

یاد رہے کہ اس سے قبل 7 مارچ 2025 کو بھی اینٹی کرپشن عدالت نے انہیں ٹڈاپ اسکینڈل میں 3 مقدمات سے بری کیا تھا۔