این ڈی ایم اے کی وارننگ: سندھ اور بلوچستان میں شدید بارش، شہری سیلاب کا خدشہ

این ڈی ایم اے نے خبردار کیا ہے کہ 7 تا 10 ستمبر کے دوران جنوب مشرقی سندھ کے بعض علاقوں میں انتہائی شدید بارشوں کا امکان ہے، جس کے نتیجے میں نچلے ساحلی اضلاع میں شہری سیلاب کا خدشہ پیدا ہو سکتا ہے۔

این ڈی ایم اے کے مطابق کیرتھر رینجز، بلوچستان کے لسبیلہ اور خضدار کے ندی نالوں میں بھی طغیانی متوقع ہے۔

مزید برآں، بھارت کے گجرات-راجستھان سرحد پر موجود بارشوں کا سسٹم مغرب کی جانب بڑھ رہا ہے، جو سندھ، ملحقہ بلوچستان اور جنوبی پنجاب کو متاثر کر سکتا ہے۔ بارشیں 10 ستمبر تک وقفے وقفے سے جاری رہ سکتی ہیں۔

این ڈی ایم اے نے عوام سے اپیل کی ہے کہ وہ ندی نالوں کو عبور کرنے سے گریز کریں تاکہ ممکنہ خطرات سے محفوظ رہیں