ڈھاکا کے دورے کے بعد نائب وزیراعظم و وزیرِ خارجہ اسحاق ڈار براہِ راست جدہ روانہ ہوں گے، جہاں وہ او آئی سی وزرائے خارجہ کونسل کے غیر معمولی اجلاس میں شرکت کریں گے۔
اس اجلاس میں فلسطین کی موجودہ صورتحال کے تناظر میں مشترکہ حکمتِ عملی پر غور کیا جائے گا۔ اجلاس میں اسرائیلی جارحیت، غزہ پر فوجی کنٹرول کے منصوبے اور فلسطینی عوام کے بنیادی حقوق کی سنگین خلاف ورزیوں پر بھی بات چیت متوقع ہے۔
پاکستان ہمیشہ عالمی فورمز پر فلسطینی عوام کی حمایت کرتا آیا ہے، اور اسحاق ڈار اجلاس میں فلسطین کی غیر متزلزل حمایت کا اعادہ کریں گے۔ وہ اسرائیل کے تمام مقبوضہ علاقوں بشمول یروشلم سے انخلا کا مطالبہ کریں گے اور غزہ پر اسرائیلی فوجی کنٹرول کے منصوبے کو پاکستان کی جانب سے واضح طور پر مسترد کریں گے۔
اس موقع پر پاکستان فلسطینی عوام کے لیے فوری انسانی امداد کی ضرورت پر زور دے گا اور آزاد فلسطینی ریاست کے قیام کے مطالبے کو بھی دہرایا جائے گا۔
ذرائع کے مطابق اجلاس کے دوران اسحاق ڈار کی اہم رکن ممالک کے وزرائے خارجہ سے دو طرفہ ملاقاتیں بھی متوقع ہیں۔
