حج 2026 کی رجسٹریشن کی تاریخ میں دو روز کی توسیع

وزارت مذہبی امور نے اعلان کیا ہے کہ حج 2026 کی رجسٹریشن کی آخری تاریخ میں دو دن کی توسیع کر دی گئی ہے۔

اب نامزد بینکوں اور وزارت کے آن لائن پورٹل پر رجسٹریشن 11 جولائی تک جاری رہے گی۔

حکام کے مطابق عازمین کی سہولت کے پیش نظر درخواستوں پر رجسٹریشن کا عمل جمعہ تک جاری رکھنے کا فیصلہ کیا گیا ہے۔

اب تک 3 لاکھ 13 ہزار سے زائد افراد حج 2026 کے لیے اپنی رجسٹریشن مکمل کر چکے ہیں۔

تاہم حج اخراجات اور دیگر شرائط و ضوابط کا اعلان بعد میں حج پالیسی کے تحت الگ سے کیا جائے گا۔

یاد رہے کہ حج 2026 کے لیے عازمین کی قبل از وقت رجسٹریشن لازمی قرار دی گئی ہے، لیکن اس رجسٹریشن پر کوئی فیس نہیں لی جا رہی۔

وزارت مذہبی امور کا کہنا ہے کہ صرف رجسٹریشن کرانے والے درخواست گزار ہی حج 2026 کے اہل تصور ہوں گے۔

ملک بھر میں منظور شدہ 15 بینکوں کے ذریعے بھی رجسٹریشن کرائی جا سکتی ہے۔

وزارت نے واضح کیا ہے کہ رجسٹریشن کے بعد عازمین سرکاری یا نجی حج اسکیم کا انتخاب کر سکیں گے۔

اس کے علاوہ رواں برس پرائیویٹ اسکیم سے رہ جانے والے عازمین کے لیے بھی یہ رجسٹریشن لازمی ہو گی۔

وزارت کے مطابق حج 2026 کے اخراجات اور شرائط و ضوابط کا الگ سے اعلان کیا جائے گا، اور یہ سارا عمل سعودی حکومت کی ہدایت پر کیا جا رہا ہے تاکہ رجسٹریشن کے اعداد و شمار سعودی حکام کو فراہم کیے جا سکیں۔