دبئی – ایشیا کپ کے شیڈول میں اہم تبدیلی کی گئی ہے جس کے تحت اب تمام میچز ابتدائی اعلان کردہ وقت سے آدھے گھنٹے بعد شروع ہوں گے۔ منتظمین کے مطابق اس فیصلے کا مقصد کھلاڑیوں اور تماشائیوں کو یو اے ای کی شدید گرمی سے محفوظ رکھنا ہے۔
تفصیلات کے مطابق ایونٹ کے 19 میں سے 18 میچز شام ساڑھے چھ بجے (مقامی وقت) شروع ہوں گے۔ البتہ 15 ستمبر کو ابوظہبی میں کھیلے جانے والے دو میچز کے اوقات مختلف ہوں گے۔ پہلا میچ یو اے ای اور عمان کے درمیان ہوگا جو سہ پہر چار بجے شروع ہوگا، جبکہ اسی شام دوسرا میچ سری لنکا اور ہانگ کانگ کے درمیان کھیلا جائے گا۔
ایشیا کپ کا سب سے بڑا اور سب سے زیادہ توجہ کا مرکز پاک بھارت ٹاکرا 14 ستمبر کو شیڈول ہے، جس کا شائقین کرکٹ بے صبری سے انتظار کر رہے ہیں۔ یہ مقابلہ ایونٹ کے اہم ترین میچز میں شمار کیا جارہا ہے۔
گروپ اسٹیج کے بعد دونوں گروپس سے ٹاپ ٹو ٹیمیں سپر فور مرحلے میں پہنچیں گی۔ سپر فور مرحلہ 20 سے 26 ستمبر تک جاری رہے گا، جس میں چھ میچز کھیلے جائیں گے۔ ان میں سے بہترین کارکردگی دکھانے والی ٹاپ ٹو ٹیمیں 28 ستمبر کو فائنل میں مدمقابل ہوں گی۔
کرکٹ ماہرین کے مطابق شام کے اوقات میں میچز شروع ہونے سے گرمی کے اثرات کم ہوں گے اور کھلاڑیوں کی کارکردگی پر مثبت اثر پڑے گا۔ شائقین کرکٹ بھی نسبتاً بہتر موسم میں اسٹیڈیم کا رخ کر سکیں گے۔
یہ فیصلہ ٹورنامنٹ کی کامیابی کے لیے ایک مثبت قدم قرار دیا جا رہا ہے، جس سے کھلاڑیوں اور تماشائیوں دونوں کو بہتر سہولت مل سکے گی۔
