واشنگٹن: ایک نئی سائنسی تحقیق میں انکشاف ہوا ہے کہ پچھلی کئی دہائیوں میں بنائے گئے کلائمیٹ ماڈلز نے عالمی درجہ حرارت اور سمندر کی سطح کے اضافے کے بارے میں حیرت انگیز حد تک درست پیشگوئی کی۔
ایم آئی ٹی، یونیورسٹی آف کیلیفورنیا اور ناسا کے محققین کے مطابق 1970 سے 2007 کے درمیان بنائے گئے 17 ماڈلز میں سے 14 نے مستقبل کے عالمی درجہ حرارت کا تقریباً درست اندازہ لگایا۔ یعنی 82 فیصد ماڈلز کی پیشگوئی حقیقت سے قریب رہی۔
اسی طرح ٹولین یونیورسٹی کی تحقیق میں سامنے آیا کہ 1996 میں آئی پی سی سی نے اگلے 30 سال میں سمندر کی سطح میں 8 سینٹی میٹر اضافے کی پیشگوئی کی تھی، جو حقیقت میں 9 سینٹی میٹر نکلا۔
دیگر تحقیقی رپورٹس، جیسے کاربن بریف اور ییل کلائمیٹ کنیکشنز، بھی اس نتیجے کی تصدیق کرتی ہیں کہ گزشتہ دہائیوں میں کیے گئے بیشتر ماڈلز نے گرین ہاؤس گیسوں اور ماحولیاتی عوامل کے اثرات کو درست طور پر سمجھا۔
ناسا کے مطابق جب پرانے ماڈلز میں ماحول کے متعلق فرضی غلطیوں کو درست کیا گیا تو درست پیشگوئی کرنے والے ماڈلز کی تعداد مزید بڑھ گئی۔
