اداکار عفان وحید نے ایک ٹی وی پروگرام میں گفتگو کے دوران اپنی ذاتی زندگی کے ایک اہم پہلو پر کھل کر بات کی۔ انہوں نے کہا کہ اگرچہ لوگ انہیں ایک پُرسکون اور خوش مزاج انسان سمجھتے ہیں، لیکن حقیقت یہ ہے کہ کبھی کبھار وہ سخت غصے میں آجاتے ہیں، اور یہ بات ان کے قریبی لوگوں کو بخوبی معلوم ہے۔
عفان نے بتایا کہ برسوں کی خود شناسی اور غور و فکر کے بعد انہیں یہ احساس ہوا کہ غصہ صرف ایک وقتی ردعمل نہیں ہوتا بلکہ اس کے پیچھے موروثی اثرات اور ماحول کا بھی گہرا تعلق ہوتا ہے۔ ان کے مطابق انسان کے لیے سب سے ضروری ہے کہ وہ اپنے رویے کو سمجھے اور خود کو پہچانے۔
انہوں نے کہا کہ وقت کے ساتھ انہوں نے خود پر قابو پانے اور ذہنی سکون حاصل کرنے کی مختلف تکنیکیں سیکھیں۔ یہ طریقے نہ صرف انہیں غصے سے بچنے میں مدد دیتے ہیں بلکہ زندگی کے مثبت پہلوؤں پر توجہ مرکوز رکھنے کا حوصلہ بھی بخشتے ہیں۔
اپنے ماضی کا ذکر کرتے ہوئے عفان نے اعتراف کیا کہ کئی بار وہ غیر ضروری طور پر سخت ردعمل ظاہر کر بیٹھے، جس پر آج انہیں افسوس ہے۔ تاہم ان کا کہنا تھا کہ خود پر کام کرنے سے ان کی شخصیت میں نمایاں بہتری آئی ہے۔
