بھارت میں معروف کار برانڈ کے خلاف مقدمہ، شاہ رخ خان اور دپیکا پڈوکون بھی نامزد

بھارتی میڈیا رپورٹس کے مطابق راجستھان کے شہر بھرت پور میں ایک مشہور کار برانڈ کے خلاف سنگین تکنیکی خرابیوں کے الزام میں مقدمہ درج کر لیا گیا ہے۔ حیران کن طور پر اس مقدمے میں بالی ووڈ کے بادشاہ شاہ رخ خان اور اداکارہ دپیکا پڈوکون کو بھی نامزد کیا گیا ہے۔

یہ مقدمہ مقامی وکیل کیرتی سنگھ نے درج کرایا، جنہوں نے 2022 میں 23.97 لاکھ بھارتی روپے کی قیمتی کار خریدی تھی۔ ان کے مطابق خریداری کے چند ماہ بعد ہی کار میں بڑی تکنیکی خرابیاں سامنے آئیں، جو کسی بھی وقت سنگین حادثے کا باعث بن سکتی تھیں۔

وکیل کیرتی سنگھ کا دعویٰ ہے کہ ڈیلرشپ نے تصدیق کی کہ مسئلہ مینوفیکچرنگ کا ہے اور اسے درست نہیں کیا جا سکتا۔ ایف آئی آر میں مؤقف اختیار کیا گیا ہے کہ کار کی خریداری کا فیصلہ شاہ رخ خان اور دپیکا پڈوکون کے اشتہارات دیکھ کر کیا گیا تھا، جن میں گاڑی کو ’ٹربل فری‘ ظاہر کیا گیا تھا۔

پولیس کے مطابق مقدمہ درج کر کے مزید تفتیش شروع کر دی گئی ہے۔