پشاور (ہیلتھ ڈیسک) خیبر پختونخوا میں پولیو وائرس کے مزید دو کیسز سامنے آگئے، جس کے بعد صوبے میں متاثرہ بچوں کی تعداد 15 اور ملک بھر میں مجموعی تعداد 23 تک پہنچ گئی ہے۔
نیشنل انسٹیٹیوٹ آف ہیلتھ اسلام آباد کی ریجنل ریفرنس لیبارٹری نے تصدیق کی ہے کہ ضلع ٹانک کی یونین کونسل مولازئی کی 16 ماہ کی بچی اور ضلع شمالی وزیرستان کی یونین کونسل میران شاہ کی 2 سالہ بچی میں پولیو وائرس پایا گیا ہے۔
اعداد و شمار کے مطابق اس سال خیبرپختونخوا میں اب تک 15 کیسز رپورٹ ہو چکے ہیں، جن میں ضلع بنوں، لکی مروت، ٹانک اور شمالی وزیرستان سے تین تین، جبکہ ضلع تورغر، ڈیرہ اسماعیل خان اور لوئر کوہستان سے ایک ایک کیس شامل ہے۔
ملک بھر میں اب تک رپورٹ ہونے والے 23 کیسز میں خیبرپختونخوا سر فہرست ہے، اس کے علاوہ سندھ سے 6 اور پنجاب و گلگت بلتستان سے ایک ایک کیس سامنے آیا ہے۔
دوسری جانب پشاور میں یکم ستمبر سے پانچ روزہ انسداد پولیو مہم شروع ہوگی، جس کے لیے ڈویژنل ٹاسک فورس نے تیاریاں مکمل کر لی ہیں۔ حکام کے مطابق پشاور، نوشہرہ، چارسدہ، ضلع مہمند اور ضلع خیبر کے ڈپٹی کمشنرز پولیو مہم کی براہ راست نگرانی کریں گے۔
کمشنر پشاور نے یقین دہانی کرائی ہے کہ پولیو ٹیموں کی سیکورٹی کے لیے فول پروف انتظامات کیے جائیں گے اور مہم کو کامیاب بنانے کے لیے تمام وسائل بروئے کار لائے جائیں گے۔
