عرب میڈیا کے مطابق سعودی عرب کے شہر جدہ میں غزہ کی المناک صورت حال پر اسلامی تعاون تنظیم (او آئی سی) کی وزرائے خارجہ کونسل کا اہم اجلاس منعقد ہوا۔ اجلاس میں پاکستان کی نمائندگی نائب وزیر اعظم و وزیر خارجہ اسحاق ڈار نے کی۔
اجلاس کے دوران خطاب کرتے ہوئے سعودی وزیر خارجہ فیصل بن فرحان نے اسرائیل کے ’’گریٹر اسرائیل‘‘ منصوبے کو شدید تنقید کا نشانہ بنایا۔ ان کا کہنا تھا کہ فلسطین کے مسئلے کا واحد اور پائیدار حل دو ریاستی فارمولا ہے۔
فیصل بن فرحان نے کہا کہ اسرائیل کی جانب سے غزہ میں یکطرفہ کارروائیاں اور حملے عالمی قوانین کی صریح خلاف ورزی ہیں۔ انہوں نے اسرائیلی وزیر اعظم نیتن یاہو کے توسیع پسندانہ بیانات کی مذمت کرتے ہوئے واضح کیا کہ ’’گریٹر اسرائیل کا وژن کسی صورت قبول نہیں‘‘۔
خیال رہے کہ اسرائیل نے حال ہی میں مغربی کنارے میں 3 ہزار سے زائد یہودی آبادکاروں کو بسانے کے منصوبے کی منظوری دی ہے، جس سے یروشلم اور مغربی کنارے کے درمیان جغرافیائی رابطہ منقطع ہونے کا خدشہ پیدا ہوگیا ہے۔
اس متنازع منصوبے کا اعلان کرتے ہوئے اسرائیلی وزیر خزانہ نے کہا تھا کہ ’’یہ منصوبہ فلسطینی ریاست کے تصور کو ہمیشہ کے لیے دفن کردے گا‘‘۔
واضح رہے کہ اقوام متحدہ، یورپی ممالک اور کئی عالمی تنظیمیں اس منصوبے کو پہلے ہی شدید مذمت کا نشانہ بنا چکی ہیں۔
