پولیس ذرائع کے مطابق گرفتار ملزم عامر عباس نے دوران تفتیش اپنی اہلیہ پر تشدد کرنے کا اعتراف کرلیا ہے۔ ملزم نے پولیس کو بتایا کہ تشدد کے دوران ثمینہ کا سر بیڈ سے ٹکرانے سے گہری چوٹ آئی، لیکن اس کے باوجود اس نے اہلیہ پر مزید تشدد کیا۔
ثمینہ کی حالت خراب ہونے پر ملزم نے اپنے بیٹے کے ہمراہ اسے اسپتال داخل کروایا۔ تفتیشی ذرائع کے مطابق اس واقعے کے وقت مقتولہ ثمینہ کا بیٹا محمد زمان گھر میں موجود نہیں تھا۔
ذرائع کا کہنا ہے کہ ملزم اور مقتولہ کے خلاف پہلے بھی ایک مقدمہ درج ہے اور عدالت میں ٹرائل جاری ہے، جبکہ زیر سماعت مقدمے میں مقتولہ، اس کا خاوند اور بیٹا نامزد ملزم ہیں۔
پولیس نے ملزم اور اس کے بیٹے کو دوبارہ علاقہ مجسٹریٹ کی عدالت پیش کرنے کا فیصلہ کیا ہے، جہاں تفتیش میں حاصل پیش رفت کی رپورٹ بھی پیش کی جائے گی۔ مقدمے کی مزید تحقیقات کے لیے پولیس نے 6 رکنی تحقیقاتی ٹیم بھی تشکیل دے دی ہے۔
