سینئر صوبائی وزیر شرجیل انعام میمن نے کہا ہے کہ کراچی میں جاری بارشوں کے دوران سندھ حکومت کی پوری مشینری فعال ہے اور نکاسیِ آب کے کام پر مکمل توجہ دی جا رہی ہے۔ ان کے مطابق مختلف علاقوں میں بارش ابھی بھی جاری ہے، اس لیے شہری بارش تھمنے کا انتظار کریں اور غیر ضروری طور پر گھروں سے باہر نہ نکلیں۔
انہوں نے کہا کہ عوام کی جان اور حفاظت سب سے مقدم ہے، جبکہ صوبائی وزیر سعید غنی اور میئر کراچی مرتضیٰ وہاب کی قیادت میں ضلعی انتظامیہ، کے ایم سی، واٹر بورڈ اور ریسکیو ادارے متحرک ہیں۔
شرجیل میمن نے مزید کہا کہ برساتی نالوں سے رکاوٹوں کو دور کرنے، مشینری کے ذریعے پانی نکالنے اور ایمرجنسی راستوں کو کھلا رکھنے کے اقدامات جاری ہیں۔ ان کا کہنا تھا کہ سندھ حکومت عوام کو ہرگز اکیلا نہیں چھوڑے گی اور ہر ممکن سہولت فراہم کر رہی ہے۔
