معروف عالمی گلوکارہ میڈونا نے غزہ کی صورتحال پر دل کھول کر بات کی ہے۔ 66 سالہ اس سٹار نے سوشل میڈیا پلیٹ فارم “ایکس” پر ایک جذباتی پیغام شیئر کرتے ہوئے کہا کہ “آپ ہمارے درمیان وہ واحد شخصیت ہیں جنہیں کوئی غزہ جانے سے روک نہیں سکتا۔”
انہوں نے مزید زور دیتے ہوئے کہا کہ غزہ میں مکمل طور پر انسانی امداد کے دروازے کھلنے چاہئیں تاکہ معصوم بچوں کو بچایا جا سکے۔ میڈونا کے مطابق، اب وقت بہت کم رہ گیا ہے۔
بیٹے کی سالگرہ پر امداد کا اعلان
میڈونا نے یہ بھی اعلان کیا کہ وہ اپنے بیٹے روکّو رچی کی 25ویں سالگرہ کے موقع پر غزہ میں کام کرنے والی امدادی تنظیموں کو عطیات دیں گی۔ انہوں نے دنیا بھر کے لوگوں سے اپیل کرتے ہوئے کہا کہ “بطور ماں، یہ میرے لیے سب سے خوبصورت تحفہ ہوگا کہ میں دنیا بھر کے لوگوں سے غزہ کے بچوں کی مدد کے لیے ان کی استطاعت کے مطابق کردار ادا کرنے کی اپیل کروں۔”
عالمی ادارہ صحت کا ردعمل
میڈونا کے اس انسانیت سے بھرپور پیغام پر عالمی ادارہ صحت (WHO) کے ڈائریکٹر جنرل نے ان کا شکریہ ادا کیا۔ انہوں نے کہا کہ آج کے دور میں انسانیت اور امن کی بات کرنا بہت ضروری ہے، اور میڈونا کی ہمدردی اور متاثرہ بچوں کے ساتھ یکجہتی بہت اہمیت رکھتی ہے۔
اگرچہ موجودہ پوپ لیو نے میڈونا کے پیغام پر براہ راست کوئی ردعمل نہیں دیا، لیکن وہ کئی بار غزہ میں انسانی حقوق کو یقینی بنانے اور طاقت کے استعمال سے گریز کرنے کی اپیل کر چکے ہیں۔
