اسپین کے شہر قرطبہ میں واقع تاریخی مسجد-کیتھیڈرل میں اچانک آگ بھڑک اٹھی، مگر خوش قسمتی سے فائر بریگیڈ کی بروقت کارروائی نے بڑے سانحے کو ٹال دیا۔
عینی شاہدین کے مطابق جیسے ہی شعلے بلند ہوئے، ریسکیو ٹیمیں فوراً پہنچ گئیں اور سیاحوں سمیت عملے کو محفوظ مقام پر منتقل کر دیا۔ دو گھنٹے کی مسلسل جدوجہد کے بعد آگ پر قابو پا لیا گیا، تاہم پولیس اور فائر بریگیڈ کی ٹیمیں پوری رات موقع پر موجود رہیں تاکہ کسی نئے خطرے کو روکا جا سکے۔
قرطبہ کے میئر نے فائر بریگیڈ کی تیز رفتاری کو سراہتے ہوئے کہا کہ اگر چند منٹ کی بھی تاخیر ہو جاتی تو نقصان ناقابلِ تلافی ہوتا۔
یہ تاریخی عمارت، جو کبھی مسجد قرطبہ تھی اور اب “مسجد-کیتھیڈرل” کہلاتی ہے، یونیسکو کے عالمی ثقافتی ورثے میں شامل ہے۔ ہر سال دنیا بھر سے لاکھوں سیاح یہاں آتے ہیں۔
واقعے کے بعد سوشل میڈیا پر آگ کی تصاویر اور ویڈیوز وائرل ہو گئیں اور دنیا بھر سے لوگ تشویش کا اظہار کرنے لگے۔ مقامی انتظامیہ کے مطابق عمارت دوبارہ سیاحوں کے لیے کھول دی گئی ہے، البتہ متاثرہ حصہ فی الحال بند ہے اور مرمت جاری ہے۔
