اداکارہ علیزہ شاہ کا منسا ملک پر ایک ارب روپے ہرجانے کا دعویٰ – ڈرامائی جھگڑا اب قانونی جنگ بن گیا
شوبز کی دنیا میں ایک پرانا تنازع اب سنگین قانونی رخ اختیار کر گیا ہے۔ معروف اداکارہ علیزہ شاہ نے اداکارہ مومنہ مقصود عرف منسا ملک کے خلاف ایک ارب روپے ہرجانے کا لیگل نوٹس بھیج دیا ہے۔ نوٹس معروف وکیل بیرسٹر علی طاہر کے ذریعے ارسال کیا گیا۔
قانونی نوٹس میں مطالبہ کیا گیا ہے کہ منسا ملک سات دن کے اندر علیزہ شاہ سے کھلے عام معافی مانگیں اور سوشل میڈیا پر ان کے خلاف پھیلایا گیا تمام مواد فوری طور پر ہٹا دیں۔ بصورت دیگر معاملہ ایف آئی اے کو بھی بھیجنے کا عندیہ دیا گیا ہے۔
نوٹس کے مطابق منسا ملک نے سوشل میڈیا پر علیزہ شاہ کے خلاف توہین آمیز اور ہتک آمیز زبان استعمال کی اور جعلی ویڈیوز کے ذریعے ان کی ساکھ کو نقصان پہنچانے کی کوشش کی۔ اس بات کا اعتراف خود منسا نے اپنے سوشل میڈیا پلیٹ فارمز پر بھی کیا۔
معاملہ یہیں ختم نہیں ہوتا۔ اگر منسا نے ایک ہفتے میں معافی نہ مانگی تو علیزہ شاہ کی جانب سے ایک کروڑ روپے کا ہتکِ عزت کا مقدمہ بھی دائر کیا جائے گا، اور ایف آئی اے سے رجوع کر کے ممکنہ سائبر کرائم شکایت بھی درج کروائی جائے گی۔
پس منظر: پرانے جھگڑے کی تلخ یادیں
دونوں اداکاراؤں کے درمیان ماضی میں ایک ڈرامہ سیٹ پر جھگڑا ہوا تھا، جس میں مبینہ طور پر منسا ملک نے علیزہ شاہ کو دھکا دیا اور تھپڑ مارا۔ جواباً علیزہ نے چپل پھینکی جو منسا کو لگی نہیں، لیکن معاملہ سوشل میڈیا پر خبروں کی زینت بن گیا۔
حال ہی میں علیزہ شاہ نے دعویٰ کیا کہ انہیں انجان نمبرز سے جان سے مارنے کی دھمکیاں موصول ہو رہی ہیں، اور ان کے مطابق اس سب کے پیچھے منسا ملک کا ہاتھ ہے۔
