ایف آئی اے ملتان زون کی بڑی کارروائی، انتہائی مطلوب انسانی اسمگلر سمیت 3 ملزمان گرفتار
وفاقی تحقیقاتی ادارے (ایف آئی اے) کے ترجمان کے مطابق، ملتان زون میں انسانی اسمگلنگ کے خلاف ایک بڑی کارروائی عمل میں لائی گئی ہے، جس کے دوران انتہائی مطلوب انسانی اسمگلر سمیت تین ملزمان کو گرفتار کیا گیا ہے۔
گرفتار ملزمان کی شناخت فیروز قیصر سگو، محمد اعظم اور محمد وزیر کے نام سے ہوئی ہے۔
ترجمان نے بتایا کہ یہ افراد سادہ لوح شہریوں کو بیرون ملک ملازمت کا جھانسہ دے کر لاکھوں روپے ہتھیانے میں ملوث پائے گئے۔
فیروز قیصر کو ایک چھاپہ مار کارروائی میں خانیوال سے گرفتار کیا گیا۔ ترجمان کے مطابق، اس کا نام انتہائی مطلوب انسانی اسمگلرز کی فہرست میں شامل تھا۔
فیروز قیصر کے خلاف ایف آئی اے ملتان زون میں 9 مقدمات درج ہیں، جن میں منی لانڈرنگ کے مقدمات بھی شامل ہیں۔ اس کے علاوہ فیصل آباد زون میں بھی اس کے خلاف مقدمات کی تفصیلات موجود ہیں۔
تحقیقات سے پتا چلا ہے کہ فیروز قیصر نے متعدد شہریوں سے دبئی اور سعودی عرب میں ملازمت دلوانے کے بہانے 82 لاکھ روپے سے زائد رقم ہتھیائی۔
دوسری جانب ملزم محمد اعظم نے ایک شہری کو آذربائیجان میں ملازمت کا جھانسہ دے کر 6 لاکھ روپے بٹورے، جبکہ محمد وزیر نے شہریوں کو دبئی اور متحدہ عرب امارات بھیجنے کے نام پر 23 لاکھ 60 ہزار روپے وصول کیے۔
ترجمان نے بتایا کہ تینوں ملزمان شہریوں کو بیرون ملک بھجوانے میں ناکام رہے اور رقم لینے کے بعد روپوش ہو گئے تھے، تاہم اب انہیں گرفتار کر کے تفتیش کا آغاز کر دیا گیا ہے۔
