“حافظ نعیم الرحمان کا غزہ کی صورتحال پر شدید ردعمل، اسلامی دنیا اور عالمی ضمیر کو جھنجھوڑنے کی اپیل”

سماجی رابطے کی ویب سائٹ ایکس (سابقہ ٹوئٹر) پر جاری ایک بیان میں امیر جماعت اسلامی حافظ نعیم الرحمان نے فلسطین کے بھوکے اور کمزور بچے 18 ماہ کے محمد زکریا کی تصویر شیئر کر کے دنیا کے ضمیر کو جھنجھوڑنے کی کوشش کی۔

انہوں نے لکھا کہ یہ تصویر امریکا اور اقوام متحدہ پر کلنک کا ٹیکہ ہے، جو نام نہاد “مہذب دنیا” کی ناکامی اور عالمی قوانین کی کھلی پامالی کو ظاہر کرتی ہے۔

حافظ نعیم نے کہا کہ فلسطین میں اسرائیلی افواج کی سفاکی انسانی تاریخ کی بدترین مثال بن چکی ہے، جہاں مساجد، اسپتالوں، اسکولوں اور پناہ گزین کیمپوں پر بلا امتیاز بمباری ہو رہی ہے۔

انہوں نے دعویٰ کیا کہ اب تک 60 ہزار سے زائد فلسطینی شہید ہو چکے ہیں، جن میں بڑی تعداد خواتین اور بچوں کی ہے، جبکہ زخمیوں اور ملبے تلے دب جانے والوں کی درست تعداد ابھی تک معلوم نہیں ہو سکی۔

امیر جماعت اسلامی نے کہا کہ اسرائیل نے خوراک، ادویات اور پانی جیسی بنیادی ضروریات تک غزہ کے عوام کی رسائی بند کر دی ہے، جس کی وجہ سے انسانی بحران مزید سنگین ہو گیا ہے۔

انہوں نے سخت الفاظ میں کہا کہ صہیونی مظالم کو امریکا کے سابق صدر ڈونلڈ ٹرمپ کی مکمل حمایت حاصل ہے، اور حیرت اس بات پر ہے کہ پاکستانی حکمرانوں نے اسی ٹرمپ کو نوبل انعام کے لیے نامزد کر دیا۔

آخر میں حافظ نعیم الرحمان نے اسلامی دنیا، خصوصاً عرب ممالک اور پاکستان کے حکمرانوں سے مطالبہ کیا کہ وہ خاموشی توڑیں، خواب غفلت سے بیدار ہوں اور امت مسلمہ کے جذبات کی سچی ترجمانی کریں۔