رات کے وقت بلڈ پریشر کی دوا لینا زیادہ مؤثر ثابت، ماہرین کی تحقیق

ماہرین صحت کے مطابق بلڈ پریشر کی دوا رات کے وقت لینا دن کے مقابلے میں زیادہ مؤثر ثابت ہو سکتا ہے، کیونکہ اس سے پورے 24 گھنٹوں، خاص طور پر صبح کے وقت، بلڈ پریشر بہتر طور پر قابو میں رہتا ہے۔

طبی ماہرین کے مطابق صبح کے وقت بلڈ پریشر اچانک بڑھنے کا امکان زیادہ ہوتا ہے، جو ہارٹ اٹیک یا فالج (اسٹروک) جیسے سنگین نتائج کا سبب بن سکتا ہے۔ اسی لیے دوا کا وقت اہمیت اختیار کر جاتا ہے۔

کچھ مطالعات سے یہ بھی ظاہر ہوا ہے کہ رات کو دوا لینے سے نیند پر مثبت اثر پڑ سکتا ہے، خاص طور پر اگر دوا میں ہلکا سا سکون آور اثر (sedative effect) بھی موجود ہو۔

سال 2019 میں شائع ہونے والی ایک جامع تحقیق کے مطابق، وہ افراد جو اپنی بلڈ پریشر کی دوا رات کو لیتے ہیں، ان میں دل کی بیماریوں، ہارٹ اٹیک اور اسٹروک کا خطرہ نمایاں طور پر کم ہو جاتا ہے۔

یہ طریقہ کار خاص طور پر کیلشیئم چینل بلاکرز (CCBs)، اے آر بیز (ARBs)، اے سی ای انہیبیٹرز (ACE inhibitors) اور بعض پیشاب آور ادویات (diuretics) کے لیے مؤثر پایا گیا ہے۔

ماہرین مشورہ دیتے ہیں کہ دوا کا وقت تبدیل کرنے سے پہلے اپنے معالج سے ضرور مشورہ کریں، کیونکہ ہر مریض کی حالت مختلف ہوتی ہے۔