پاکستان اور بنگلہ دیش کے درمیان ٹی20 سیریز 20 جولائی سے شروع ہوگی، ٹرافی کی رونمائی ڈھاکہ میں

ڈھاکا میں ایک مقامی ہوٹل میں منعقدہ تقریب کے دوران پاکستان اور بنگلہ دیش کے درمیان ٹی20 سیریز کی ٹرافی کی رونمائی کی گئی، جس میں دونوں ٹیموں کے کپتانوں نے فوٹو شوٹ میں حصہ لیا۔

تین میچوں پر مشتمل ٹی20 سیریز کا آغاز اتوار 20 جولائی سے ہوگا۔ پاکستان ٹیم کی قیادت سلمان علی آغا کریں گے جبکہ بنگلہ دیش کی کپتانی لٹن داس کے سپرد ہے۔

سیریز کا پہلا میچ شیرِ بنگلہ نیشنل کرکٹ اسٹیڈیم، ڈھاکہ میں کھیلا جائے گا، جو شام 5 بجے (پاکستانی وقت کے مطابق) شروع ہوگا۔

پاکستان ٹیم نے جمعہ کے روز شیرِ بنگلہ اسٹیڈیم میں پہلا تربیتی سیشن مکمل کیا۔ ٹیم بدھ کے روز ڈھاکہ پہنچی تھی، جبکہ جمعرات کا دن آرام کے لیے مختص رکھا گیا۔ تربیتی سیشن میں بیٹنگ، بولنگ اور فیلڈنگ کی بھرپور مشقیں کی گئیں۔

پاکستان اور بنگلہ دیش کے درمیان باقی دونوں ٹی20 میچز 22 اور 24 جولائی کو بھی شیرِ بنگلہ اسٹیڈیم میں ہی کھیلے جائیں گے۔

یاد رہے کہ دونوں ٹیموں کے درمیان آخری ٹی20 سیریز رواں سال مئی میں پاکستان میں کھیلی گئی تھی، جس میں گرین شرٹس نے بنگلہ دیش کو 0-3 سے کلین سوئپ کیا تھا۔

دوسری جانب بنگلہ دیش کرکٹ بورڈ (بی سی بی) نے سیریز کے لیے ٹکٹوں کی قیمتوں کا اعلان کر دیا ہے، جو 300 ٹکہ سے 3,500 ٹکہ تک رکھی گئی ہیں تاکہ تمام طبقوں کے شائقین کو میچ دیکھنے کا موقع مل سکے۔

ٹکٹوں کی فروخت کے لیے بی سی بی نے ڈیجیٹل نظام متعارف کرایا ہے، اور آن لائن بکنگ کا آغاز 15 جولائی سے ہو چکا ہے۔

پاکستان اسکواڈ:

سلمان علی آغا (کپتان)، ابرار احمد، احمد دانیال، فہیم اشرف، فخر زمان، حسن نواز، حسین طلعت، خوشدل شاہ، محمد عباس آفریدی، محمد حارث (وکٹ کیپر)، محمد نواز، صاحبزادہ فرحان (وکٹ کیپر)، صائم ایوب، سلمان مرزا، سفیان مقیم

بنگلہ دیش اسکواڈ:

لٹن داس (کپتان)، تنزید حسن تمیم، پرویز حسین ایمون، محمد نعیم شیخ، توحید ہردوئے، جاکر علی انک، شمیم حسین پٹواری، مہدی حسن مرزا، رشاد حسین، شاک مہدی حسن، نسوم احمد، تسکین احمد، مستفیض الرحمان، شوریف الاسلام، تنزیم حسن ساکب، محمد سیف الدین