معروف پاکستانی کوہ پیما افتخار سدپارہ کے ٹو پر مہم کے دوران جاں بحق
کے ٹو مہم کے دوران معروف پاکستانی کوہ پیما افتخار سدپارہ برفانی تودے کی زد میں آکر جاں بحق ہوگئے، جبکہ تین غیر ملکی کوہ پیما زخمی ہوئے۔
ڈپٹی کمشنر اسکردو عارف حسین کے مطابق افتخار سدپارہ کی موت برفانی تودے میں دبنے کے باعث واقع ہوئی۔
عارف حسین کے مطابق افتخار سدپارہ کا تعلق سدپارہ گاؤں سے تھا، جبکہ برفانی تودے سے متاثرہ تین غیر ملکی کوہ پیماؤں کو ریسکیو کر کے بحفاظت نکال لیا گیا ہے۔ تینوں کو معمولی چوٹیں آئی ہیں۔
افتخار سدپارہ کے جسد خاکی کو بذریعہ ہیلی کاپٹر آج اسکردو منتقل کیا جا رہا ہے، جہاں سے اُن کی میت آبائی گاؤں سدپارہ لے جائی جائے گی، جہاں ان کی تدفین کی جائے گی۔
