سیالکوٹ یومِ دفاع پاکستان کی مرکزی تقریب جناح ہال قلعہ سیالکوٹ میں منعقد ہوئی، جہاں وفاقی وزیر دفاع خواجہ آصف نے ہلالِ استقلال کی تبدیلی کی رسم ادا کی۔ تقریب میں اسٹیشن کمانڈر، ارکان اسمبلی، ڈپٹی کمشنر، ڈی پی او سمیت پولیس، ریسکیو 1122 اور شہری دفاع کے رضاکاروں نے شرکت کی اور قومی پرچم کو سلامی پیش کی۔
خطاب کرتے ہوئے وزیر دفاع نے کہا کہ آپریشن بنیان مرصوص جیسے واقعات قوموں کی زندگی کو نئی جلا بخشتے ہیں۔ انہوں نے 1965 کی جنگ کو یاد کرتے ہوئے کہا کہ پاکستانی افواج نے دشمن کا غرور خاک میں ملا دیا۔
خواجہ آصف کا کہنا تھا کہ پاک فوج کا شہادت کا جذبہ عروج پر ہے اور اسی جذبے نے ملک کو ناقابلِ تسخیر بنا دیا ہے۔ انہوں نے مزید کہا کہ پاک فوج نہ صرف ملک کے جغرافیائی دفاع بلکہ سفارتی اور معاشی محاذوں پر بھی بھرپور کردار ادا کر رہی ہے۔
انہوں نے زور دیا کہ آج کے دن ہمیں عہد کرنا ہوگا کہ ذاتی مفادات سے بالاتر ہو کر ملک کی ترقی اور خوشحالی کے لیے کام کریں۔
تقریب کے اختتام پر جشنِ عید میلاد النبی ﷺ کی مناسبت سے کیک کاٹا گیا۔
