کراچی: شہر کے ساحلوں، بالخصوص سی ویو، کلفٹن اور کے پی ٹی کے اطراف لاکھوں ٹن کچرا جمع ہونے سے شدید تعفن پھیلنے کے ساتھ ساتھ آبی حیات کو بھی سنگین خطرات لاحق ہوگئے ہیں۔
اس صورتحال کے پیش نظر کراچی پورٹ ٹرسٹ (کے پی ٹی) نے وفاقی وزیر برائے بحری امور جنید انور چوہدری کی ہدایت پر “پوسٹ رین کلین اپ” مہم شروع کردی ہے، جس کے تحت بندرگاہ کے مختلف حصوں میں بڑے پیمانے پر صفائی کا عمل جاری ہے۔
محکمہ میرین پروٹیکشن کے مطابق برتھوں، جیٹیوں اور نیوی گیشن چینلز سے اب تک 150 ٹن کچرا نکالا جا چکا ہے جبکہ عملہ دن رات سمندر کو آلودگی سے پاک کرنے میں مصروف ہے۔ حکام کے مطابق مون سون بارشوں کے دوران نالوں اور دریاؤں سے لاکھوں ٹن کچرا سمندر میں شامل ہو جاتا ہے جس کے باعث مچھلیوں اور دیگر آبی حیات کی زندگیاں شدید خطرے میں پڑ جاتی ہیں۔ یہ صفائی مہم ایک ماہ تک جاری رکھنے کا فیصلہ کیا گیا ہے۔
ماہرین کا کہنا ہے کہ کیماڑی سے منوڑہ تک پھیلا ہوا کچرا مچھلیوں کی افزائش کو بری طرح متاثر کر رہا ہے جبکہ نائٹروجن ڈائی آکسائیڈ اور اوزون کی سطح میں اضافہ نہ صرف سمندری ماحولیاتی نظام بلکہ انسانی صحت کے لیے بھی نقصان دہ ہے۔
واضح رہے کہ چند سال قبل سمندری آلودگی کے نتیجے میں کراچی پورٹ ٹرسٹ ایریا، منوڑہ چینل اور چرنہ کریک سمیت کئی اہم آبی گزرگاہوں پر ایک ہی وقت میں 100 ٹن سے زائد مچھلیاں ہلاک ہوگئی تھیں۔
وفاقی وزیر بحری امور جنید انور چوہدری نے کہا ہے کہ سمندر کو آلودگی سے بچانا قومی ذمہ داری ہے اور حکومت تمام وسائل بروئے کار لا کر سمندری ماحولیاتی نظام کے تحفظ کے لیے عملی اقدامات جاری رکھے گی۔
