کراچی کو 4 اگست کو 9 گھنٹے کے لیے پانی کی قلت کا سامنا، شہریوں سے احتیاط کی اپیل

ترجمان واٹر کارپوریشن کے مطابق، کراچی شہر کو 4 اگست بروز پیر کو صبح 10 بجے سے شام 7 بجے تک پانی کی فراہمی متاثر ہو گی، کیونکہ کے-الیکٹرک کی جانب سے ایک 9 گھنٹے طویل شٹ ڈاؤن کے دوران مرکزی واٹر پمپنگ اسٹیشنز کی مرمت اور مینٹیننس کا عمل انجام دیا جائے گا۔

ترجمان کے مطابق، اس شٹ ڈاؤن کے دوران شہر کو پانی کی فراہمی میں 100 ملین گیلن کی کمی واقع ہو سکتی ہے۔ اس کمی کے باعث لانڈھی، کورنگی، شاہ فیصل کالونی، بن قاسم، ڈی ایچ اے اور نارتھ ناظم آباد کے علاقے براہ راست متاثر ہوں گے۔

فی الحال کراچی کو روزانہ 650 ملین گیلن پانی فراہم کیا جا رہا ہے، تاہم واٹر کارپوریشن کی کوشش ہے کہ 550 ملین گیلن کی فراہمی جاری رکھی جائے تاکہ شہریوں کو کم سے کم مشکلات کا سامنا ہو۔

ترجمان نے وضاحت کی کہ یہ شٹ ڈاؤن کے-الیکٹرک کے ڈپٹی جنرل منیجر برائے گرڈ سسٹم آپریشنز کی درخواست پر عمل میں لایا جا رہا ہے، جس کا مقصد گرڈ سسٹم کی مینٹیننس اور بہتری ہے۔

ترجمان واٹر کارپوریشن نے شہریوں سے اپیل کی ہے کہ وہ پانی کے استعمال میں احتیاط برتیں، غیر ضروری ضیاع سے گریز کریں اور اس دوران ادارے سے تعاون کریں تاکہ یہ عارضی پریشانی بہتر طریقے سے نمٹائی جا سکے۔