ڈیرہ اسماعیل خان اور نواب شاہ میں پرانی دشمنیوں نے چھ جانیں لے لیں، 5 مزید افراد قتل
ایک ہی دن میں ملک کے دو مختلف علاقوں سے افسوسناک خبریں سامنے آئی ہیں، جہاں پرانی دشمنیوں نے کئی خاندانوں کو سوگوار کر دیا۔
تفصیلات کے مطابق خیبر پختونخوا کے ضلع ڈیرہ اسماعیل خان میں دو گروپوں کے درمیان فائرنگ کا تبادلہ ہوا، جو کہ رشتہ داروں کے درمیان پرانے تنازع کا نتیجہ تھا۔
جھڑپ وانڈہ بیرون کے علاقے میں ہوئی جس کے دوران دونوں طرف سے فائرنگ کی گئی۔
اس واقعے میں چھ افراد جاں بحق اور ایک زخمی ہوا۔
جاں بحق افراد کی شناخت نقیب اللہ، شفیع اللہ، نجیب اللہ، جلال، نوید اور جہانزیب کے ناموں سے ہوئی ہے۔
لاشوں اور زخمی کو قریبی اسپتال منتقل کر دیا گیا ہے، جبکہ پولیس اور انتظامیہ نے علاقے میں حالات کنٹرول کرنے کے لیے سیکیورٹی مزید سخت کر دی ہے۔
تحقیقات بھی جاری ہیں تاکہ مکمل حقیقت سامنے آ سکے۔
دوسری طرف، سندھ کے ضلع نواب شاہ سے بھی ایک دل دہلا دینے والا واقعہ رپورٹ ہوا ہے۔
کیریا موری کے قریب یار محمد بھنگوار کے علاقے میں فائرنگ کے نتیجے میں بھنگوار برادری کے پانچ افراد کو قتل کر دیا گیا۔
ایس ایس پی شبیر سیٹھار کے مطابق جاں بحق ہونے والوں میں شہباز، رجب، قربان، تاج محمد، اور فرمان بھنگوار شامل ہیں۔
یہ واقعہ بھی پرانے جھگڑے کا تسلسل بتایا جا رہا ہے۔ پولیس نے لاشوں کو اسپتال منتقل کر دیا ہے اور معاملے کی چھان بین جاری ہے۔
دونوں واقعات نے مقامی لوگوں میں خوف و ہراس پھیلا دیا ہے، اور سوشل میڈیا پر بھی ان پر غم و غصے کا اظہار کیا جا رہا ہے۔
