پاکستان تحریک انصاف کی جانب سے جاری نوٹس میں واضح کیا گیا ہے کہ بانی پی ٹی آئی کے کیسوں کی سماعتوں پر نہ پہنچنے والے ٹکٹ ہولڈرز اور تنظیمی عہدیداروں سے وضاحت طلب کی گئی ہے۔
نوٹس کے مطابق 19، 20 اور 21 اگست کو پارٹی کی ہدایت پر اڈیالہ جیل اور سپریم کورٹ میں ضمانتوں کی سماعت کے موقع پر تمام ٹکٹ ہولڈرز، اسٹیک ہولڈرز اور تنظیمی عہدیداروں کو اپنی موجودگی یقینی بنانی تھی۔ تاہم افسوس کے ساتھ نوٹ کیا گیا کہ متعدد ذمہ داران مقررہ ہدایات پر عمل نہ کرسکے۔
پارٹی نے تمام غیر حاضر رہنے والے افراد کو ہدایت کی ہے کہ وہ اپنی غیر حاضری کی تحریری وضاحت 24 گھنٹوں میں چیف آرگنائزر آفس پنجاب کو ارسال کریں۔
مزید کہا گیا ہے کہ اگر وضاحت تسلی بخش نہ ہوئی تو متعلقہ افراد کے خلاف پارٹی کے ضابطۂ اخلاق کے تحت سخت تنظیمی کارروائی عمل میں لائی جائے گی۔
