صوبائی وزیر اطلاعات شرجیل انعام میمن نے کہا ہے کہ پنجند بیراج پر پانی کی آمد اور اخراج 306,740 کیوسک ریکارڈ کیا گیا ہے۔ انہوں نے بتایا کہ گزشتہ 24 گھنٹوں میں 12,449 افراد کو کچے کے علاقوں سے محفوظ مقامات پر منتقل کیا گیا، جبکہ اب تک مجموعی طور پر 121,769 افراد کو محفوظ جگہوں پر پہنچایا جا چکا ہے۔
شرجیل میمن کے مطابق حکومت سندھ کے قائم کردہ 155 فکسڈ اور موبائل ہیلتھ کیمپس میں گزشتہ 24 گھنٹوں کے دوران 5,848 متاثرین کو علاج کی سہولیات فراہم کی گئیں، جبکہ مجموعی طور پر 33,803 افراد کو طبی امداد دی گئی ہے۔
انہوں نے مزید بتایا کہ گزشتہ 24 گھنٹوں میں 14,495 مویشیوں کو محفوظ مقامات پر منتقل کیا گیا اور 64,487 مویشیوں کی ویکسینیشن و علاج کیا گیا، جس سے اب تک ویکسینیشن اور علاج پانے والے مویشیوں کی مجموعی تعداد 820,811 تک پہنچ گئی ہے۔
شرجیل انعام میمن نے بتایا کہ:
ٹرمو بیراج پر آمد و اخراج 412,992 کیوسک
تونسہ بیراج پر آمد 238,312 کیوسک، اخراج 224,872 کیوسک
گڈو بیراج پر آمد 360,976 کیوسک، اخراج 325,046 کیوسک
سکھر بیراج پر آمد 329,648 کیوسک، اخراج 278,398 کیوسک
کوٹری بیراج پر آمد 237,922 کیوسک، اخراج 215,567 کیوسک ریکارڈ کیا گیا۔
انہوں نے کہا کہ تربیلا ڈیم 100 فیصد جبکہ منگلا ڈیم 87 فیصد بھر چکا ہے، جبکہ خانپور، راول اور سملی ڈیم میں بھی پانی کی سطح بلند ہے۔ سندھ حکومت پانی کی سطح میں اتار چڑھاؤ کی مسلسل نگرانی کر رہی ہے۔
شرجیل انعام میمن نے بتایا کہ سندھ حکومت نے پی ڈی ایم اے اور دیگر اداروں کے تعاون سے ریسکیو کارروائیاں تیز کر دی ہیں۔ مزید 22 کشتیاں مختلف اضلاع کو فراہم کی گئی ہیں جن میں:
8 کشتیاں کمشنر آفس سکھر،
4 کشتیاں کمشنر آفس لاڑکانہ،
4 کشتیاں کمشنر آفس شہید بینظیر آباد،
5 کشتیاں پاکستان نیوی سکھر،
اور ایک کشتی ریسکیو 1122 حیدرآباد کو دی گئی ہے۔
صوبائی وزیر نے عوام سے اپیل کی کہ وہ حکومت کے ساتھ تعاون کریں اور کسی بھی ہنگامی صورتحال میں ریسکیو اداروں سے فوری رابطہ کریں۔ انہوں نے یقین دہانی کرائی کہ سندھ حکومت متاثرہ عوام کو کسی صورت اکیلا نہیں چھوڑے گی اور ہر ممکن مدد فراہم کرے گی۔
