سینئر صوبائی وزیر مریم اورنگزیب کے مطابق پنجاب میں حالیہ سیلاب سے کل 42 لاکھ سے زائد افراد متاثر ہوئے ہیں اور 14 لاکھ 96 ہزار ایکڑ رقبے پر کھڑی فصلیں تباہ ہو چکی ہیں۔
انہوں نے بتایا کہ 4 ہزار 155 دیہات متاثر ہوئے، جن میں دریائے چناب کے 1957، راوی کے 1477، ستلج کے 625 اور دریائے سندھ کے 96 دیہات شامل ہیں۔ دریائے سندھ کے سیلاب سے 2 لاکھ 44 ہزار سے زائد افراد متاثر ہوئے۔
وزیر کے مطابق 22 اگست سے 7 ستمبر تک 22 لاکھ سے زائد افراد کو محفوظ مقامات پر منتقل کیا جا چکا ہے۔ 494 میڈیکل کیمپس اور 413 ریلیف کیمپس چوبیس گھنٹے امدادی سرگرمیوں میں مصروف ہیں، جبکہ ایک ہزار سے زائد فیلڈ ہسپتال، ماں بچہ وینز اور کلینک آن ویلز متاثرہ مقامات پر کام کر رہے ہیں۔
سیلاب سے متاثرہ 16 لاکھ مویشیوں کو بھی محفوظ مقامات پر منتقل کر دیا گیا ہے۔ متاثرین کو خوراک، صاف پانی اور انسولین سمیت دیگر ضروری ادویات فراہم کی جا رہی ہیں۔ وبائی امراض سے بچاؤ کے لیے مچھر مار اسپرے جاری ہیں، اور زیادہ متاثرہ شہروں میں اضافی مشینری اور عملہ تعینات کیا گیا ہے۔
مریم اورنگزیب نے کہا کہ حکومت مسلسل پانی کے بہاؤ کی نگرانی کر رہی ہے اور صورتحال کے مطابق حکمت عملی میں تبدیلی کی جا رہی ہے۔ انہوں نے واضح کیا کہ صوبے کے تاریخ کے سب سے بڑے سیلاب میں وزیراعلیٰ مریم نواز شریف کی قیادت میں ریسکیو اور ریلیف آپریشن سب سے وسیع اور تیز ترین ہے
