محکمہ داخلہ پنجاب کے مطابق لودھراں میں سیلاب متاثرین کی مدد اور ریلیف سرگرمیوں کے لیے پاک فوج کو طلب کرلیا گیا ہے۔ اس سے قبل لاہور، قصور، سیالکوٹ، فیصل آباد، نارووال، اوکاڑہ، سرگودھا اور حافظ آباد میں بھی فوج کو تعینات کیا جاچکا ہے۔
ترجمان کے مطابق فوجی دستے ضلعی انتظامیہ کے ساتھ مل کر انسانی جانوں کے تحفظ اور ریسکیو آپریشنز میں حصہ لے رہے ہیں۔ حکومت پنجاب کا کہنا ہے کہ سیلاب سے متاثرہ علاقوں میں ریسکیو اینڈ ریلیف آپریشن 24/7 جاری ہے جس میں ضلعی انتظامیہ، پی ڈی ایم اے، سول ڈیفنس، ریسکیو اور پولیس سرگرم ہیں۔
ریسکیو آپریشن میں 9 ہزار سے زائد سول ڈیفنس رضاکار حصہ لے رہے ہیں جبکہ متاثرہ علاقوں میں ریلیف کیمپس قائم کر دیے گئے ہیں۔ سول ڈیفنس عوام اور مویشیوں کو محفوظ مقامات پر منتقل کرنے میں پیش پیش ہے۔
محکمہ داخلہ نے عوام سے اپیل کی ہے کہ وہ اس مشکل گھڑی میں انتظامیہ اور ریسکیو ٹیموں کے ساتھ تعاون کریں۔
