بیجنگ میں وزیراعظم شہباز شریف اور چینی قیادت کے درمیان اہم ملاقات ہوئی جس میں پاک چین تعلقات کی مثبت رفتار پر اطمینان کا اظہار کیا گیا۔ وزیراعظم نے پاکستان کی علاقائی سالمیت، خودمختاری اور ترقی کے لیے چین کی غیر متزلزل حمایت پر شکریہ ادا کیا۔
دونوں رہنماؤں نے 2 ستمبر کو ہونے والی ملاقات میں طے پانے والے فیصلوں کے مطابق ہمہ موسمی تزویراتی تعاون کو مزید مضبوط بنانے کے عزم کا اعادہ کیا۔ اس موقع پر مشترکہ ایکشن پلان 2024-2029 پر دستخط کو بڑی پیش رفت قرار دیا گیا۔
وزیراعظم نے کہا کہ پاکستان میں جاری اصلاحاتی اقدامات کے مثبت نتائج چین کی بھرپور حمایت سے ممکن ہوئے، اور جلد ہی چین کی کیپٹل مارکیٹ میں پانڈا بانڈز متعارف کرانے کا عندیہ دیا۔
گفتگو کے دوران بیلٹ اینڈ روڈ انیشیٹو (BRI) اور چین-پاکستان اقتصادی راہداری (CPEC) کی اہمیت کو اجاگر کیا گیا۔ وزیراعظم نے قراقرم ہائی وے، ریلوے لائن-1 کی بحالی اور گوادر پورٹ کے مکمل آپریشنل ہونے پر زور دیا۔
دونوں ممالک نے سی پیک فیز 2 کو اپ گریڈ کرنے اور پانچ نئے کوریڈورز پر مشترکہ کام کرنے پر اتفاق کیا۔
وزیراعظم نے بیجنگ میں جاری بزنس ٹو بزنس سرمایہ کاری کانفرنس کا ذکر کیا جس میں 300 سے زائد پاکستانی اور 500 چینی کمپنیاں شریک ہیں۔ انہوں نے زراعت، معدنیات، کان کنی، ٹیکسٹائل، صنعت اور آئی ٹی کو ترجیحی شعبے قرار دیا۔
مزید برآں، دونوں رہنماؤں نے طے کیا کہ آئندہ سال پاک چین سفارتی تعلقات کی 75ویں سالگرہ شایان شان طریقے سے منائی جائے گی۔
اس موقع پر سی پیک فیز 2، سائنس و ٹیکنالوجی، آئی ٹی، میڈیا اور زراعت سمیت مختلف شعبوں میں تعاون بڑھانے کے لیے معاہدوں اور مفاہمتی یادداشتوں پر دستخط بھی کیے گئے۔
