لودھراں ۾ عوام ايڪسپريس ٽرين حادثي جي جاچ ۾ اهم اڳڀرائي ٿي آهي، جتي بليڪ باڪس مان حاصل ٿيندڙ ڊيٽا سان اهو طئي ڪيو ويندو ته ڊرائيور بروقت بريڪ ڇو نه لڳائي سگهيو ۽ ٽرين جي اسپيڊ 15 ڪلوميٽر في ڪلاڪ بدران وڌيڪ ڇو هئي۔
فيڊرل انسپيڪٽر آف ريلوي حادثي جي تحقيقات شروع ڪري ڇڏي آهي ۽ ڊرائيور سميت ٻين ملازمن جا بيان به قلمبند ڪيا ويا آهن۔ ريلوي ذريعن موجب، انڪوائري مڪمل ٿيڻ کان پوءِ رپورٽ وزارتِ ريلوي کي موڪلي ويندي۔
ٻئي پاسي اسلام آباد ايڪسپريس حادثي جي انڪوائري رپورٽ وزارت کي جمع ڪرائي وئي آهي، پر جن آفيسرن کي ذميوار قرار ڏنو ويو هو انهن خلاف اڃا تائين ڪا به ڪارروائي نه ٿي سگهي۔
هن مهيني دوران پاڪستان ريلوي جي تاريخ ۾ پهريون ڀيرو هڪ ئي مهيني ۾ 9 ٽرين حادثا ۽ ڊيريلمينٽ جا واقعا سامهون آيا آهن، جنهن سبب مسافرن لاءِ ريل جو سفر خطري ۾ بدلجي ويو آهي۔
وفاقي وزير ريلوي حنيف عباسي هڪ اهم اجلاس ۾ آفيسرن تي ڪاوڙ جو اظهار ڪندي چيو ته هاڻي ڪنهن کي به بخشبو نه، آفيسر ايئر ڪنڊيشنڊ ڪمرن مان ٻاهر نڪرن، ٽريڪ جي معائنو ڪن ۽ ڊرائيورن لاءِ ريفريشر ڪورسز ڪرائن۔
ابتدائي رپورٽ موجب عوام ايڪسپريس حادثو بروقت بريڪ نه لڳائڻ جي ڪري پيش آيو، جڏهن ته ريلوي ذريعن جو چوڻ آهي ته بریک فیل ٿيڻ جو سوال ئي پيدا نٿو ٿئي، ڇاڪاڻ ته ٽرين ۾ جديد سلف بریک سسٽم لڳل آهي۔
حادثي ۾ انجن ۽ پنج بوگيون اُلٽي پيون، ڪجهه هڪ ٻئي مٿان چڙهي ويون، جنهن مان ظاهر ٿئي ٿو ته ٽرين جي رفتار مقرر حد کان ڪافي وڌيڪ هئي۔ بليڪ باڪس کي ڊي ڪوڊ ڪرڻ کانپوءِ ئي حتمي جاچ رپورٽ تيار ڪئي ويندي۔
