پاکستان انڈر 16 والی بال ٹیم کو ایشین چیمپئن شپ جیتنے پر 82 لاکھ روپے کیش ایوارڈ دینے کا اعلان
اسلام آباد: پاکستان اسپورٹس بورڈ (پی ایس بی) نے ایشین چیمپئن شپ میں تاریخی کامیابی حاصل کرنے پر انڈر 16 والی بال ٹیم کو 82 لاکھ روپے کیش انعام دینے کا اعلان کیا ہے۔
پی ایس بی کے ترجمان کے مطابق، ٹیم کے ہر کھلاڑی کو 6 لاکھ روپے کا انعام دیا جائے گا، جبکہ کوچنگ اسٹاف کے لیے بھی مجموعی انعام کا 50 فیصد مختص کیا گیا ہے۔
پی ایس بی کی 2024 کی کیش ایوارڈ پالیسی کے تحت، براعظمی سطح پر ٹیم ایونٹس میں گولڈ میڈلسٹ کھلاڑیوں کو انفرادی سطح پر ایوارڈ کا 30 فیصد حصہ دیا جاتا ہے۔ اس پالیسی کے تحت 12 رکنی اسکواڈ کو مجموعی طور پر 72 لاکھ روپے دیے جائیں گے، جب کہ کوچ کو 10 لاکھ روپے ملیں گے۔
پاکستان انڈر 16 والی بال ٹیم نے فائنل میں ایران کو سنسنی خیز مقابلے کے بعد 2-3 سے شکست دے کر چیمپئن شپ اپنے نام کی۔ ٹیم پورے ٹورنامنٹ میں ناقابل شکست رہی۔
ترجمان نے بتایا کہ کیش ایوارڈز صرف ان کھلاڑیوں اور کوچز کو دیے جائیں گے جن کے نام ٹورنامنٹ کی آفیشل فہرست میں شامل ہیں، اور ایوارڈز کے اجرا کے لیے تمام مطلوبہ دستاویزات کا مکمل ہونا ضروری ہے۔
پی ایس بی کا کہنا ہے کہ نوجوان کھلاڑیوں کی حوصلہ افزائی اور مالی معاونت ادارے کی ترجیحات میں شامل ہے، اور انعامات آئندہ چند روز میں تقسیم کیے جائیں گے۔
