اٹلی کے شہر وینس میں معروف سیریز ایملی اِن پیرس کی شوٹنگ کے دوران افسوسناک واقعہ پیش آیا، جہاں 47 سالہ پروڈکشن ممبر ڈیاگو بوریلّا اچانک انتقال کرگئے۔
اطالوی میڈیا کے مطابق بوریلّا ہوٹل ڈینیلی میں شوٹنگ کی تیاری کر رہے تھے کہ اچانک گر پڑے۔ طبی عملے نے فوری طور پر امداد فراہم کی تاہم وہ جانبر نہ ہو سکے۔
پیراماؤنٹ ٹیلی ویژن اسٹوڈیوز، جو یہ سیریز نیٹ فلکس کے لیے پروڈیوس کر رہا ہے، نے ان کے انتقال کی تصدیق کرتے ہوئے کہا:
“ہم اپنے پروڈکشن فیملی کے ایک قیمتی رکن کی اچانک جدائی پر گہرے دکھ کا اظہار کرتے ہیں۔ اس مشکل گھڑی میں ہماری ہمدردیاں مرحوم کے اہل خانہ اور دوستوں کے ساتھ ہیں۔”
رپورٹس کے مطابق ڈیاگو بوریلّا کے انتقال کے بعد شو کی شوٹنگ عارضی طور پر روک دی گئی ہے۔ سیریز کے پانچویں سیزن کی شوٹنگ 15 اگست کو وینس میں شروع ہوئی تھی اور 25 اگست تک مکمل ہونی تھی۔ امکان ظاہر کیا جا رہا ہے کہ بوریلّا کی آخری رسومات کے بعد ریکارڈنگ دوبارہ شروع کی جائے گی۔
واضح رہے کہ ایملی اِن پیرس ایک رومانٹک کامیڈی ڈرامہ ہے جو پہلی بار 2020 میں کورونا وبا کے دوران ریلیز ہوا تھا۔ سیریز کا نیا سیزن رواں سال کے آخر تک ناظرین کو پیش کیے جانے کا امکان ہے۔
