وفاقی دارالحکومت میں وزیراعظم محمد شہباز شریف سے فلسطینی صدر کے مشیر برائے مذہبی امور و شرعی عدالت کے چیف جسٹس محمود صدیقی الھباش کی سربراہی میں وفد نے ملاقات کی۔ وفد میں مسجد اقصیٰ کے امام احمد حسین اور پاکستان میں تعینات فلسطینی سفیر بھی شامل تھے۔
وزیراعظم نے فلسطینی صدر ڈاکٹر محمود عباس کے لیے تہنیتی پیغام پہنچاتے ہوئے کہا کہ پاکستان فلسطین کے عوام کے ساتھ اپنی مکمل اور غیر متزلزل حمایت جاری رکھے گا۔
شہباز شریف کا کہنا تھا کہ فلسطینی عوام نے بے پناہ قربانیاں دے کر اسرائیلی جارحیت کا بہادری سے مقابلہ کیا، جبکہ غزہ کے لوگ قابض افواج کے ہاتھوں انسانی ساختہ قحط کا سامنا کر رہے ہیں۔ انہوں نے یقین دہانی کرائی کہ پاکستان ہر سفارتی فورم پر فلسطینی عوام کے حقوق کے لیے آواز بلند کرتا رہے گا اور انسانی امداد کی فراہمی جاری رکھے گا۔
فلسطینی مشیر نے پاکستانی عوام اور حکومت کا شکریہ ادا کرتے ہوئے کہا کہ پاکستان مشکل وقت میں فلسطینی عوام کے لیے تقویت کا باعث ہے۔ اس موقع پر انہوں نے وزیراعظم کو صدر محمود عباس کا خط بھی پیش کیا۔
ملاقات میں نائب وزیراعظم و وزیر خارجہ سینیٹر اسحاق ڈار، وزیر اطلاعات عطا اللہ تارڑ، وزیر مذہبی امور سردار محمد یوسف، معاون خصوصی طارق فاطمی اور اسلامی کونسل کے چیئرمین بھی شریک تھے
