وزیراعظم شہباز شریف سے عالمی بینک کے نائب صدر کی ملاقات، ترقیاتی شراکت داری کو وسعت دینے پر اتفاق

اسلام آباد میں وزیراعظم شہباز شریف اور عالمی بینک کے مشرقِ وسطیٰ، شمالی افریقا، افغانستان اور پاکستان کے ریجنل نائب صدر عثمان ڈیون کے درمیان اہم ملاقات ہوئی، جس میں پاکستان اور عالمی بینک کے درمیان دیرینہ شراکت داری کو مزید مضبوط بنانے کے عزم کا اظہار کیا گیا۔

وزیراعظم شہباز شریف نے عالمی بینک کا پاکستان کے ساتھ طویل تعاون پر تہ دل سے شکریہ ادا کیا، خاص طور پر بینک کے صدر اجے بنگا اور سابق کنٹری ڈائریکٹر ناجی بنہسین کی خدمات کو سراہا، جنہوں نے پاکستان کے لیے نئے کنٹری پارٹنرشپ فریم ورک (CPF) کی تشکیل اور عملدرآمد میں کلیدی کردار ادا کیا۔

وزیراعظم نے توانائی، انسانی وسائل، موسمیاتی تبدیلی اور گورننس اصلاحات جیسے اہم شعبوں میں CPF کی اسٹریٹجک اہمیت پر زور دیا۔ انہوں نے بھارت کے یکطرفہ اقدامات کے تناظر میں سندھ طاس معاہدے سے متعلق پاکستان کے مؤقف کی اصولی حمایت پر بھی عالمی بینک کا شکریہ ادا کیا۔

شہباز شریف نے 2022 کے تباہ کن سیلاب کے بعد عالمی بینک کی فوری اور فراخدلانہ مدد کو بھی خراجِ تحسین پیش کیا، جس سے نہ صرف امدادی سرگرمیاں ممکن ہوئیں بلکہ بحالی و تعمیر نو کے عمل کو تقویت ملی۔

ملاقات کے دوران عثمان ڈیون نے وزیراعظم کی قیادت میں جاری میکرو اکنامک اصلاحات اور ادارہ جاتی بہتری کے اقدامات کو سراہا۔ ان کا کہنا تھا کہ عالمی بینک پاکستان کے ساتھ تعاون کو مزید گہرا اور وسیع کرنے کے لیے پرعزم ہے، تاکہ ملک مالیاتی استحکام اور پائیدار ترقی کی راہ پر گامزن رہے۔

ملاقات کے اختتام پر حکومتِ پاکستان اور عالمی بینک نے مشترکہ طور پر اس عزم کا اظہار کیا کہ آنے والے برسوں میں ترقیاتی اہداف کے حصول اور عوام کے لیے ایک خوشحال مستقبل کی تشکیل کے لیے باہمی تعاون کو مزید مضبوط کیا جائے گا۔