وزیراعظم سے علی بابا گروپ وفد کی ملاقات، ای کامرس فروغ کیلئے کمیٹی کی ہدایت

وزیراعظم شہباز شریف سے علی بابا گروپ کے وفد نے ملاقات کی، جس کی قیادت انٹرنیشنل مارکیٹس کے صدر جیمز ڈونگ کر رہے تھے۔

اس ملاقات میں وفاقی وزیر آئی ٹی شزا فاطمہ، چیئرمین ایف بی آر اور دیگر متعلقہ اعلیٰ افسران بھی شریک تھے۔

وزیراعظم نے گفتگو کے دوران ای کامرس کو مزید فروغ دینے کے لیے خصوصی کمیٹی بنانے کی ہدایت دی۔

ان کا کہنا تھا کہ اس وقت علی بابا جیسے پلیٹ فارمز پر تین لاکھ سے زائد پاکستانی مصنوعات فروخت ہو رہی ہیں۔

انہوں نے زور دیا کہ ان ای کامرس پلیٹ فارمز پر کاروبار کرنے والے پاکستانیوں کے لیے ٹھوس اقدامات کیے جائیں۔

وزیراعظم نے کہا کہ آج کے دور میں ای کامرس برآمدات بڑھانے کا اہم ذریعہ ہے اور یہ حکومت کے برآمدات پر مبنی معیشت کے ویژن کی تکمیل کے لیے بہت ضروری ہے۔

علی بابا گروپ کے صدر جیمز ڈونگ نے بھی اس موقع پر ای کامرس کے ذریعے پاکستانی کاروباری برادری کے کردار کو سراہا۔

ان کا کہنا تھا کہ علی بابا پر تین لاکھ سے زیادہ پاکستانی تیار کردہ مصنوعات فروخت ہو رہی ہیں۔

انہوں نے یہ بھی بتایا کہ پاکستانی ٹیکسٹائل مصنوعات کی خاصی مانگ ہے اور ملک میں ای کامرس کو مزید وسعت دینے کی بہت صلاحیت موجود ہے۔