“نوجوانوں میں دل کی بیماریاں کیوں بڑھ رہی ہیں؟ ڈاکٹر صغیر کی مفید نصیحتیں”
آج کل نوجوانوں میں دل کی بیماریاں ایک تشویشناک مسئلہ بن چکی ہیں۔ اس کی کئی وجوہات ہیں جن پر بات کرنا بہت ضروری ہے۔ اسی حوالے سے اے آر وائی نیوز کے پروگرام باخبر سویرا میں این آئی سی وی ڈی کے ایگزیکٹو ڈائریکٹر پروفیسر ڈاکٹر صغیر نے امراض قلب سے بچاؤ کے لیے ناظرین کو مفید مشورے دیے۔
انہوں نے کہا کہ جدید دور میں طرز زندگی میں جو تبدیلی آئی ہے، وہ ان امراض کی ایک بڑی وجہ ہے۔ لوگ صحت مند غذا کی طرف دھیان نہیں دیتے، ورزش نہیں کرتے، پیدل نہیں چلتے اور رات کی نیند کا بھی خیال نہیں رکھتے۔
ڈاکٹر صغیر نے یہ بھی کہا کہ آج کل کی نوجوان نسل گھریلو خریداری کے لیے مارکیٹ پیدل جانے کے بجائے موٹر سائیکل پر جانا ضروری سمجھتی ہے۔ اب تو آن لائن آرڈر کرنا فیشن بن گیا ہے، جو کہ ایک خطرناک صورتحال ہے۔
انہوں نے مزید کہا کہ بہت سے خاندانوں میں ذیابیطس، بلڈ پریشر اور امراض قلب موروثی ہوتے ہیں۔ ایسے خاندانوں کو چاہیے کہ گھر کے تمام افراد کی اسکریننگ کروائیں۔
پروفیسر ڈاکٹر صغیر نے بتایا کہ غیر فعال طرز زندگی، غیر صحت بخش خوراک، تمباکو نوشی اور ذہنی تناؤ کا بڑھنا نوجوانوں میں دل کے مسائل میں اضافے کی اہم وجوہات ہیں۔ یہ خاص طور پر اس لیے تشویشناک ہے کہ کم عمر مریضوں کی زندگی لمبی ہوتی ہے، اور اگر بیماری نوجوانی میں شروع ہو جائے تو یہ شدید اور طویل مدتی پیچیدگیوں کا سبب بن سکتی ہے۔
