ممبئی میں فرضی دہشت گردانہ دھمکی، پولیس نے ملزم گرفتار کر لیا

بھارتی میڈیا کے مطابق 5 ستمبر کو ممبئی پولیس کو واٹس ایپ پر ایک پیغام موصول ہوا جس میں دعویٰ کیا گیا کہ ’’لشکر جہادی‘‘ نامی فرضی تنظیم کے 14 دہشت گرد شہر میں داخل ہو چکے ہیں۔

دھمکی آمیز پیغام میں کہا گیا کہ دہشت گرد 34 گاڑیوں میں 400 کلو آر ڈی ایکس رکھ کر ممبئی میں دھماکوں کی منصوبہ بندی کر رہے ہیں، جس سے تقریباً ایک کروڑ لوگوں کی جان خطرے میں پڑ سکتی تھی۔

تاہم تحقیقات کے بعد یہ دھمکی جھوٹی ثابت ہوئی اور معلوم ہوا کہ یہ واقعہ ایک ذاتی جھگڑے کا نتیجہ تھا۔

پولیس کے مطابق بہار کے رہائشی اشون کمار سپرا نے اپنے پرانے دوست فیروز کو پھنسانے کے لیے یہ جھوٹا پیغام بھیجا۔ فیروز نے 2023 میں اشون کے خلاف مقدمہ درج کروایا تھا، جس پر وہ تین ماہ جیل میں رہا۔

بھارتی پولیس نے ملزم اشون کمار کو گرفتار کر کے اس کا موبائل فون اور سم کارڈ ضبط کر لیا۔ حکام کے مطابق یہ واقعہ ایک سنگین مذاق تھا جس نے پورے شہر میں خوف و ہراس پیدا کر دیا۔